سیاہی دل کے زاہد کی گئی ہے مئے کی برکت سے

سیاہی دل کے زاہد کی گئی ہے مئے کی برکت سے

چھوڑایا اس نے اس داغ سیہ کو آب رحمت سے

رہا کرتا ہے زاہد در پہ تیرے ایک مدت سے

نہ اب کچھ صومعہ سے کام ہے اس کو نہ خلوت سے

نہ ہووے تا شکستہ شیشۂ دل سنگ فرقت سے

حوالہ کر دیا تجھ کو صنم رکھیو حفاظت سے

سرور میکشاں حاصل کہاں ہے زہد و تقویٰ سے

ابھی کرتا ہوں ترک مئے جو حاصل ہو ریاضت سے

سکھایا مغجپوں کو چھین لیں عمامہ زاہد کا

ہوئی بے عزتی اس کی تو بس تیری شرارت سے

مسلمانوں کا ایمان چھین لینا کام ہے ان کا

وصیؔ میں خوب واقف بتوں کے دین و ملت سے