وہ آج سربزم ادھردیکھ رہے ہیں

وہ آج سربزم ادھردیکھ رہے ہیں

حسرت بھری نظروں سے نظر دیکھ رہے ہیں

دیکھا تھا جنہوں نے نظر شوق کو اس کی

مدت سے وہ اب زخم جگر دیکھ رہے ہیں

ایسا نہ ہو چل جائے یہ ناوک اب انہیں پر

آئینہ میں وہ اپنی نظر دیکھ رہے ہیں

ان کو بھی کیا جوشِ محبت نے پریشاں

نالوں کا مرے اب وہ اثر دیکھ رہے ہیں

ہو قتل گہہ ناز میں کیا جان کی پروا

اک اک کو یہاں سینہ سپر دیکھ رہے ہیں

مہمان ہوا اجڑے ہوئے دل میں وہ آ کر

آباد بہت دن میں یہ گھر دیکھ رہے ہیں

اللہ کرے اب یوں ہی بے ہوش رہوں میں

زانو پہ وہ رکھ کر مرا سر دیکھ رہے ہیں

رکھا تو قدم ہم نے رہ عشق میں وشنوؔ

سو قسم کے آزار وخطر دیکھ رہے ہیں