yaro main agar ’ishq ka bimar na hota

yaaro maiñ agar ’ishq kā bīmār na hotā

hargiz vo mire dar pai-e-āzār na hotā

āshiq se agar vasl kā iqrār na hotā

to hashr talak vāda-e-dīdār na hotā

gar zulf kā ruḳh jānib-e-ruḳhsār na hotā

kāfir se musalmāñ ko sarokār na hotā

hotī na jo aariz se siyah zulf ko sāzish

habshī koī gore kā taraf-dār na hotā

laT zulf kī hotī na agar sahar kā laTkā

dil us ke laTakne pe giraftār na hotā

rakhte na barahman se agar shaiḳh jī rishta

tasbīh-e-sulaimānī meñ zunnār na hotā

hotā na muqayyad meñ agar jalva-e-mutlaq

har rañg meñ be-rañg numūdār na hotā

jaatā maiñ ḳhudā jaane kidhar raah bhaTak ke

raste pe agar ḳhāna-e-ḳhummār na hotā

vallāh 'turāb' us but-e-rahzan se na bachtā

allāh agar us kā madad-gār na hotā

yaro main agar ’ishq ka bimar na hota

hargiz wo mere dar pai-e-azar na hota

aashiq se agar wasl ka iqrar na hota

to hashr talak wada-e-didar na hota

gar zulf ka ruKH jaanib-e-ruKHsar na hota

kafir se musalman ko sarokar na hota

hoti na jo aariz se siyah zulf ko sazish

habshi koi gore ka taraf-dar na hota

laT zulf ki hoti na agar sahar ka laTka

dil us ke laTakne pe giraftar na hota

rakhte na barahman se agar shaiKH ji rishta

tasbih-e-sulaimani mein zunnar na hota

hota na muqayyad mein agar jalwa-e-mutlaq

har rang mein be-rang numudar na hota

jata main KHuda jaane kidhar rah bhaTak ke

raste pe agar KHana-e-KHummar na hota

wallah 'turab' us but-e-rahzan se na bachta

allah agar us ka madad-gar na hota