نہ کس طرح سے کروں نالہ و فغاں صیاد

نہ کس طرح سے کروں نالہ و فغاں صیاد

کہ چھیڑتا ہے تو ہر لحظہ ہر زماں صیاد

پھنسایا تو نے ہزاروں کو دے کے دم ظالم

رہے گی یاد ہمیں تیری داستاں صیاد

ہمارے سامنے گردوں کا ظلم کیا شے ہے

قفس کی ہم نے اٹھائی ہیں سختیاں صیاد

چمن سے تونے مرا آشیاں اجاڑ دیا

رکھا نشان بھی میرا نہیں وہاں صیاد

قفس میں رکھ کے پروں کو ہمارے باندھ نہ تو

نہ اس طرح سے ہو تو ہم سے بدگماں صیاد

چمن میں آیا میں القصہ عشق میں گل کے

سناؤں اپنی کہاں تک میں داستاں صیاد

نہ پوچھو مجھ سے مری حسرتوں کا عالم یاسؔ

کہ فصل گل میں چھڑاتا ہے بوستاں صیاد