ہوش میں آ عقل سے کچھ کام لے

ہوش میں آ عقل سے کچھ کام لے

ہاتھ سے ساقی کے بڑھ کر جام لے

تذکرہ لیلیٰ کا اب ہونے کو ہے

دونوں ہاتھ سے کلیجہ تھام لے

ہر پریشانی سے پائے گا نجات

میرے خواجہ کا جو دل سے نام لے

ہے خیال یار پہلو میں تیرے

کام اس سے اے دلِ ناکام لے

اور سب اشغال رکھ بالائے طاق

نام لیلیٰ کا ہی صبح و شام لے

زادِ رہ تو باندھ لے تیار ہو

آ گیا دلدار کا پیغام لے

ادّعائے عشق محبوب خدا

شرم کا حاذقؔ خدا کا نام لے