لاکھوں پردوں کے اندر چھپا ہے

لاکھوں پردوں کے اندر چھپا ہے

خوب دیکھا تو پھر جابجا ہے

کچھ عجب رنگ اس یار کا ہے

سب میں ہے اور سب سے جدا ہے

نحن اقرب اسی نے کہا ہے

کس کو تو ڈھونڈتا پھر رہا ہے

ابتدا وہ وہی انتہا ہے

ایک نکتہ کا سب دائرہ ہے

تیری ہستی کی ہستی ہی کیا ہے

تیر ہستی پہ ہنسنا بجا ہے

منہ سے غفلت کا برقعہ ہٹا دے

آئینہ دیکھ وہ برملا ہے

اس کے ہر شئے میں لاکھوں ہیں جلوے

ایک قطرے میں دریا بھرا ہے

اس کی بادامی آنکھوں کے قربان

جس نے بے دام دل لے لیا ہے

سارا عالم نمایاں ہے اس سے

تیری صورت ہی خود آئینہ ہے

مظہر ذات ہے ذات تیری

عین دریا یہی بلبلا ہے

شکل حاذقؔ پہ دھوکا نہ کھانا

وہ تو مکار بہروپیا ہے