کب ایک دل ہی ہجر سے بیمار ہو گیا

کب ایک دل ہی ہجر سے بیمار ہو گیا

سر بھی تو وقفِ سنگِ درِ یار ہو گیا

بس تیرے عشق کا مجھے آزار ہو گیا

بیمار ہو گیا ہوں میں بیمار ہو گیا

یا خواجۂ دکن کبھی بھولو نہ عشق میں

عصیاں کا مرے سر پر بہت بار ہو گیا

تیرِ نگاہ آپ نے ایسا چلا دیا

سینہ کے اور جگر کے مرے پار ہو گیا

جب سے سدھارے ہادی مرے چھوڑ کر مجھے

چلنا بھی دو قدم مجھے دشوار ہو گیا

غافل طلب میں تال کی مر کر رہا یوں ہی

مردار کی طلب میں وہ مردار ہو گیا

حاذقؔ ہی جان و دل سے فدا کچھ نہیں حضور

قربان اس کا آپ پہ گھر بار ہو گیا