لطف کا کوئی کرشمہ وہ دکھاتے بھی نہیں

لطف کا کوئی کرشمہ وہ دکھاتے بھی نہیں

اور ستاتے ہیں زیادہ کہ ستاتے بھی نہیں

زندگی کا کوئی پیغام سناتے بھی نہیں

کاہش درد تو کیا درد بڑھاتے بھی نہیں

حضرت دل کی خموشی کہ طلسم حیرت

حال کہتے بھی نہیں حال چھپاتے بھی نہیں

ہائے کیا کشمکش افزاہے امید موہوم

جان جاتی بھی نہیں اور وہ آتے بھی نہیں

میری برگشتہ نصیبی سے گلہ بھی ان کو

اور بگڑی ہوئی تقدیر بناتے بھی نہیں

یہ بھی روشن ہے کہ ہر ذرہ ترا آئینہ

اور ترے ڈھونڈنے والے تجھے پاتے بھی نہیں

جو انہیں درد کی تسکیں کا گماں ہوتا ہے

ضد سے پھر موت کا پیغام سناتے بھی نہیں

مرنے والوں کو خطا کار وفا کہتے ہیں

زندگی کی کوئی تدبیر بتاتے بھی نہیں

جعد مشکیں سے تو کرتے ہیں مداوائے غشی

یاسؔ ہشیار مگر ہوش میں آتے بھی نہیں