یہاں دیکھا وہاں دیکھا ادھر دیکھا ادھر دیکھا

یہاں دیکھا وہاں دیکھا ادھر دیکھا ادھر دیکھا

ہر اک جانب ہر اک شے میں اسی کو جلوہ گردیکھا

مرا اشکِ ندامت سے جو دامن اس نے تر دیکھا

نزول رحمت باری ہوا جنت میں گھر دیکھا

نہ دی شرم وحیا نے جب اجازت بات کرنے کی

بصد انداز پھر اس نے کنکھیوں سے ادھر دیکھا

وہ بے پردہ مری میت پہ یہ کہتے ہوئے آئے

ہم اپنا منہ چھپا لیں گے ہمیں تم نے اگر دیکھا

شکایت کچھ نہیں تجھ سے اگر ہے کچھ تو ان سے ہے

کبھی حال مریض غم نہ تونے چارہ گر دیکھا

ظہیرؔ ان بھولی بھالی شکل والوں کی محبت میں

ہمیشہ دل کا نقصاں جان کا ہم نے ضرر دیکھا