aap ki mujh pe agar chashm-e-inayat ho jae

aap kī mujh pe agar chashm-e-'ināyat ho jaa.e

ham-nashīñ rashk kareñ ġhairoñ ko hairat ho jaa.e

aap ko bhī jo kisī ġhair se ulfat ho jaaye

jaisī hālat hai mirī aap kī hālat ho jaaye

gar sharf mere siyah-ḳhāne ko baḳhsheñ sarkār

merī tauqīr baḌhe ghar kī bhī zīnat ho jaaye

bazm-e-ḳhūbāñ meñ hai us fitna adā kī aamad

kyā 'ajab hai ki numūdār qayāmat ho jaaye

fā.ida kuchh bhī nahīñ aap ke bahlāne se

ġhair-mumkin hai ki taskīn tabī'at ho jaaye

laakh parde pe ye hai husn kā un ke 'ālam

aur parde se nikal aa.eñ to aafat ho jaaye

us meñ sāne.a kā 'ajab raaz hai poshīda 'zahīr'

zindagī rañg na badle to qayāmat ho jaaye

aap ki mujh pe agar chashm-e-'inayat ho jae

ham-nashin rashk karen ghairon ko hairat ho jae

aap ko bhi jo kisi ghair se ulfat ho jaye

jaisi haalat hai meri aap ki haalat ho jaye

gar sharf mere siyah-KHane ko baKHshen sarkar

meri tauqir baDhe ghar ki bhi zinat ho jaye

bazm-e-KHuban mein hai us fitna ada ki aamad

kya 'ajab hai ki numudar qayamat ho jaye

faida kuchh bhi nahin aap ke bahlane se

ghair-mumkin hai ki taskin tabi'at ho jaye

lakh parde pe ye hai husn ka un ke 'alam

aur parde se nikal aaen to aafat ho jaye

us mein sanea ka 'ajab raaz hai poshida 'zahir'

zindagi rang na badle to qayamat ho jaye