ایک بھیڑ کا حضرت کلیم اللہ سے ڈر کر بھاگنا۔ دفترششم

ایک بھیڑ حضرت کلیم اللہ سے ڈر کر بھاگی۔ آپ جو اس کے پیچھے دوڑے تو وہ اور بھاگی یہاں تک کہ تلاش اور تعاقب میں آپ کے جوتے ٹوٹ گئے اور پاؤں میں آبلے پڑگئے۔ شام تک اس کو ڈھونڈتے رہے۔ آخر کار بھیڑ تھک کر سست کھڑی ہوگئی تو حضرت کلیم اللہ اس تک پہنچ گئے۔ پھر آپ نے اس کی گرد جھاڑی۔ آپ اس کے سراور پیٹھ پر ہاتھ پھیر تے تھے اور ماں کی طرح محبت سے پیش آرہے تھے۔ آپ میں ذرہ برابر بھی غصہ نہ تھا بلکہ اس بھیڑ کی تکان پر آنکھوں میں آنسو بھر لائے اور اس سے کہنے لگے کہ یہ مانا کہ تجھے مجھ پر رحم نہ آیا مگر بتا کہ تونے اپنے پر یہ تکلیف کیوں گوارا کی؟ اس وقت خدا نے ملائکہ سے ارشاد فرمایا کہ دیکھو، یہی شخص ہماری نبوت کے لائق ہے۔

خود حضرت مصطفیٰ کا ارشاد ہے کہ ہر نبی خواہ جوان ہو خواہ بچہ اس کا گلہ بانی کرنا ضروری ہے۔ ان میں صبر و وقار پیدا کرنے کے لئے خدائے تعالیٰ نبوت سے پہلے ان کو گلہ بان بناتا ہے۔