ایک گنوار کا اندھیرے میں شیر کو کھجانا۔ دفتردوم

ایک گنوار نے گائے طویلے میں باندھی، شیر آیا اور گائے کو کھا پی وہیں بیٹھ گیا۔ وہ گنوار رات کے اندھیرے میں اپنی گائے کو ٹٹولتا ہوا طویلے پہنچا اور اپنے خیال میں گائے کو بیٹھا پاکر شیر کے ہاتھ پیر پر، کبھی پیٹھ اور پہلو پر اور کبھی نیچے اوپر ہاتھ پھیر نے لگا۔ شیر نے اپنے جی میں کہا کہ اگر ذرا بھی اجالا ہوتا تو اس کا پِتا پھٹ جاتا اور دل خون ہوجاتا۔ یہ اس قدر گستاخانہ جو مجھے کھجاتا ہے اس کی وجہ یہ ہے کہ مجھے گائے سمجھ رہا ہے۔

حق بھی یہی کہتا ہے کہ اے فریب خوردہ اندھے تو نہیں جانتا کہ میرے نام سے طور چکنا چور ہوگیا تھا۔ تونے تقلیدی طور پر اپنے ماں باپ سے خدا کا نام سنا ہے تحقیق کے ساتھ اس سے واقف ہو جائے تو طور کی طرح تو بھی بے نشان و بے جائے ہوجائے۔