ایک شخص کا نمازِ جماعت کے نہ ملنے پر حسرت کرنا۔ دفتردوم

ایک شخص مسجد میں داخل ہورہا تھا۔ دیکھا کہ لوگ باہر چلے آرہے ہیں۔ پوچھنے لگا کہ کیا جماعت ہوچکی جو لوگ مسجد سے باہر آرہے ہیں۔ ایک نے کہا کہ حضرت پیغمبر جماعت سے نماز ادا فرماچکے۔ ارے بے وقوف تو کہاں چلا حضرت تو سلام پھیر چکے۔ اس نے جوہائے کی تو دھواں باہر نکلنے لگا۔ اس کی آہ سے خونِ دل کی بو آنے لگی۔ یہ دیکھ کر کسی نمازی نے کہا کہ اے نماز کھونے والے اپنی یہ آہ تو مجھے بخش دے۔ میں نے اپنی نماز تجھے بخشی۔ اس نے کہا کہ آہ میں نے دی اور نماز قبول کی۔

اس شخص نے وہ آہ بڑے اعزاز سے لے لی اور بڑی فروتنی و رقت کے ساتھ اپنے گھر واپس ہوا۔ وہ باز تھا جسے تلاش نے شہباز بنا دیا۔ رات کو خواب میں آوازِ غیب آئی کہ تونے آبِ حیواں خریدلیا۔ تیری اس خرید و بدل کے اعزاز میں ساری مخلوقات کی نماز مقبول ہوگئی۔