خدا کا موسیٰ کو حکم دینا کہ مجھ کو اس منہ سے بُلا کہ جس سے کبھی گناہ نہ کیا ہو۔ دفتردوم

اگر تو دعا کے وقت ذکرِ الٰہی میں مشغول نہیں رہتا تو جا صاف باطن لوگوں سے دعا کروا۔ اسی واسطے حضرت موسیٰ سے خدا نے فرمایا کہ اے کلیم اللہ! ایسے منہ سے میری مدد طلب کر جس سے تو نے کوئی گناہ نہ کیا ہو۔ موسیٰ نے کہا کہ میرا ایسا منہ کہاں، تو حکم ہوا کہ دوسرے کے منہ سے دعا کروا کیوں کہ تو نے دوسرے کے منہ سے کوئی گناہ نہیں کیا جس منہ سے تونے کبھی گناہ نہیں کیا وہ دوسرے ہی کا منہ ہوسکتا ہے تو ایسا عمل اختیار کر کہ بہت سے منہ تیرے واسطے دن رات دعا میں مصروف رہیں۔

اگر یہ ممکن نہیں تو اپنے منہ کو پاک کر اور اپنی روح کو جگا۔ خدا کا ذکر پاک ہے جہاں پاکی داخل ہوتی ہے وہاں سے ناپاکی دور ہوجاتی ہے۔ ہرچیز اپنی ضد سے بھاگتی ہے۔ چنانچہ جب اُجالا ہوتا ہے تو رات غائب ہوجاتی ہے۔ جب نامِ پاک منہ پر چڑھ جاتا ہے تو نہ وہ پہلا منہ رہتا ہے نہ پلیدی رہتی ہے۔