aapko pata nahin jab aapko pata hun main

aap ko paatā nahīñ jab aap ko paatā huuñ maiñ

yā to kho jaatā huuñ yā phir kho diyā jaatā huuñ maiñ

ā.īna ban kar muqābil us ke jab aatā huuñ maiñ

bandagī meñ bhī ḳhudā.ī kī jhalak paatā huuñ maiñ

kuchh taḌap jaatā huuñ kuchh taḌpā diyā jaatā huuñ maiñ

kyā mohabbat jurm hai jis kī sazā paatā huuñ maiñ

had se baḌh jaatī hai jab kaifiyat-e-vāraftagī

har qadam par ik fareb-e-ārzū khātā huuñ maiñ

kaam ban jaate haiñ is dīvāngī meñ saikḌoñ

kuchh banāyā jā rahā huuñ kuchh banā jaatā huuñ maiñ

kuchh maqām aise bhī aate haiñ sulūk-e-ishq meñ

ek gum-dar-gum haqīqat ban ke rah jaatā huuñ maiñ

ek dhun aisī bhī hotī hai kisī kī yaad meñ

jāgtā huuñ dil se aur āñkhoñ se so jaatā huuñ maiñ

panja-e-dast-e-duā se bhī ḳhalāsī mil ga.ī

us kī marzī jab se apnā mudda.ā paatā huuñ maiñ

tohmat-e-markaz-gurezī se bachāyā ishaq ne

us ke dar se har jagah vābastagī paatā huuñ maiñ

fikr-e-uqbā kar ke nāhaq vaqt kyuuñ zaa.e.a karūñ

us ko ḳhud hī laaj hogī jis kā kahlātā huuñ maiñ

jaane kyuuñ vo aur bhī kuchh duur aate haiñ nazar

fikr kī manzil meñ jitnī duur bhī jaatā huuñ maiñ

us kī shān-e-dast-gīrī se kuchh aisā ishaq hai

ehtirāman bil-amad bhī Thokareñ khātā huuñ maiñ

luT ga.ī 'kāmil' jahāñ saarī matā-e-zindagī

kyā tamāshā hai vahīñ se zindagī paatā huuñ maiñ

aap ko pata nahin jab aap ko pata hun main

ya to kho jata hun ya phir kho diya jata hun main

aaina ban kar muqabil us ke jab aata hun main

bandagi mein bhi KHudai ki jhalak pata hun main

kuchh taDap jata hun kuchh taDpa diya jata hun main

kya mohabbat jurm hai jis ki saza pata hun main

had se baDh jati hai jab kaifiyat-e-waraftagi

har qadam par ek fareb-e-arzu khata hun main

kaam ban jate hain is diwangi mein saikDon

kuchh banaya ja raha hun kuchh bana jata hun main

kuchh maqam aise bhi aate hain suluk-e-ishq mein

ek gum-dar-gum haqiqat ban ke rah jata hun main

ek dhun aisi bhi hoti hai kisi ki yaad mein

jagta hun dil se aur aankhon se so jata hun main

panja-e-dast-e-dua se bhi KHalasi mil gai

us ki marzi jab se apna muddaa pata hun main

tohmat-e-markaz-gurezi se bachaya ishaq ne

us ke dar se har jagah wabastagi pata hun main

fikr-e-uqba kar ke nahaq waqt kyun zaea karun

us ko KHud hi laj hogi jis ka kahlata hun main

jaane kyun wo aur bhi kuchh dur aate hain nazar

fikr ki manzil mein jitni dur bhi jata hun main

us ki shan-e-dast-giri se kuchh aisa ishaq hai

ehtiraman bil-amad bhi Thokaren khata hun main

luT gai 'kaamil' jahan sari mata-e-zindagi

kya tamasha hai wahin se zindagi pata hun main