is bazm ka naqsha hi anokha hai naya hai

is bazm kā naqsha hī anokhā hai nayā hai

jibrīl-e-amīñ bāñdhe hue haath khaḌā hai

hūroñ kī zabānoñ pe yahāñ salle-’alā hai

ai mujra.ī-e-tā’zīm ho jitnī ho bajā hai

darbār-e-husainī hai yahāñ 'arsh jhukā hai

mahtāb bhī qurbān hai vo husn milā hai

jur.at hai vo jur.at koī ham-sar na huā hai

kyā sūrat-o-sīrat ho bayāñ saaf khulā hai

ham-shakl-e-nabī hai pisar sher-e-ḳhudā hai

vo laal hai jo god meñ zahrā ke palā hai

logoñ ne ye sarkār kā irshād sunā hai

ye mujh se hai maiñ us se rahā farq hī kyā hai

ye martaba auroñ ko milegā na milā hai

darbār-e-risālat se ye e'lān huā hai

kaunain kā muḳhtār imaam dūsrā hai

īmān kī kahtā huuñ ye īmān mirā hai

dekhā hai sunā hai ye haqīqat hai bajā hai

mushkil meñ jahāñ yaad kiyā duur balā hai

kyā naam husain ibn-e-'alī nām-e-ḳhudā hai

har daur kā darmāñ hai vo har dukh kī davā hai

akbar se javāñ beTe kā vo daaġh lagā hai

'abbās 'alam-dār kamar toḌ gayā hai

us par bhī ye allāh rī ā.īn-e-vafā hai

har haal meñ shākir hai na shikva na gilā hai

ik sabr kā banda hai ki raazī ba-razā hai

mazlūm hai bekas hai ġharīb-ul-ġhurbā hai

ik paikar-e-tā’at hai ki tasvīr-e-vafā hai

chup-chāp zamāna kī havā dekh rahā hai

har haal meñ shākir hai na shikva na gilā hai

ik sabr kā banda hai ki raazī ba-razā hai

Dartā hai bahādur kahīñ afvāj-e-dunī se

āñkheñ vo laḌā letā hai nezoñ kī anī se

maidān koī le to le maidāñ ke dhanī se

bai’at kī talab aur imām-e-madnī se

ik baḌ hai sharābī kī ye hazyān huā hai

vāqif nahīñ kyā martaba-e-panjatanī se

aatā nahīñ kyuuñ baaz bhalā bad-suḳhanī se

jaate rahe kyā hosh bhī ā'zā-shikanī se

bai’at kī talab aur imām-e-madnī se

ik baḌ hai sharābī kī ye hazyān huā hai

dam-bhar kī numā.ish hai ye sab jalva-numā.ī

baaqī jo rahegī to vahī shān-e-ḳhudā.ī

kis baat pe naḳhvat hai ye kyā dil meñ hai aa.ī

duniyā ke liye mālik-e-’uqbā se laḌā.ī

duniyā kī hukūmat to ye do din kī havā hai

anjām dikhā deñ yahīñ har dushman-e-dīñ ko

chakrā deñ ishāroñ hī meñ us charḳh-e-barīñ ko

aa'dā pe ulaT deñ abhī maqtal kī zamīñ ko

vo chāheñ to finnār kareñ fauj-e-la'īñ ko

vo mālik-e-kul haiñ unheñ dushvār hī kyā hai

gustāḳhiyāñ ye bādshah-e-’arsh-e-nashīñ se

kam-baḳht phirā jaatā hai kyuuñ qibla-e-dīñ se

dozaḳh ke banā Daale haiñ sāmān yahīñ se

itnā to koī pūchh le us shimr-e-la’īñ se

zālim tujhe kuchh pās-e-nabī ḳhauf-e-ḳhudā hai

ye nāzish-e-qudrat hai ye hai haq kī sadāqat

ye fakHr-e-imāmat hai yahī jān-e-kHilāfat

kam hogī qayāmat se na kuchh us kī shahādat

zālim tujhe mā'lūm hai shabbīr kī 'azmat

ye us kā navāsā hai jo mahbūb-e-ḳhudā hai

kHushnūdī-e-kHāliq ke talab-gār haiñ maulā

dīdār kī rahmat ke ḳharīdār haiñ maulā

har rasm-e-mohabbat se ḳhabar-dār haiñ maulā

jaañ dene ko sau jaan se tayyār haiñ maulā

har haal meñ raazī haiñ ye ā.īn-e-vafā hai

haañ zauq-e-shahādat kī hai tauqīr nirālī

peshānī-e-tā’at kī hai tanvīr nirālī

tā’līm-e-risālat kī hai tāsīr nirālī

takmīl-e-shahādat kī hai tasvīr nirālī

ḳham hai sar-e-taslīm ki maulā kī razā hai

Dar hai ki bapā aur hī kohrām na ho jaa.e

āġhāz jise kahte haiñ anjām na ho jaa.e

us sub.h-e-qayāmat kī yahīñ shaam na ho jaa.e

mahshar bhī kahīñ qatl-gah-e-’ām na ho jaa.e

kHūn-e-shah-e-mazlūm hai ḳhud bol uThā hai

jis vaqt asīroñ ko nazar aayā madīna

kuchh kah nahīñ sakta jo qayāmat huī barpā

har biibī ke lab par thī sadā yā-shah-e-bat.hā

fariyād ki tārāj huā gulshan-e-zahrā

sādāt kā ye qāfila ġhurbat meñ luTā hai

chehra bhī hai maġhmūm to āñkheñ bhī haiñ pur-nam

har saañs kī āvāz meñ hai nāla-e-paiham

'ārif se chhupāoge kahāñ tak alam-o-ġham

sar dhunte hue baiThe hue kaisā hai ye mātam

kyuuñ ġham kī chaḌhā.ī hai 'ḳhalīl' aaj ye kyā hai

is bazm ka naqsha hi anokha hai naya hai

jibril-e-amin bandhe hue hath khaDa hai

huron ki zabanon pe yahan salle-’ala hai

ai mujrai-e-ta’zim ho jitni ho baja hai

darbar-e-husaini hai yahan 'arsh jhuka hai

mahtab bhi qurban hai wo husn mila hai

jurat hai wo jurat koi ham-sar na hua hai

kya surat-o-sirat ho bayan saf khula hai

ham-shakl-e-nabi hai pisar sher-e-KHuda hai

wo lal hai jo god mein zahra ke pala hai

logon ne ye sarkar ka irshad suna hai

ye mujh se hai main us se raha farq hi kya hai

ye martaba auron ko milega na mila hai

darbar-e-risalat se ye e'lan hua hai

kaunain ka muKHtar imam dusra hai

iman ki kahta hun ye iman mera hai

dekha hai suna hai ye haqiqat hai baja hai

mushkil mein jahan yaad kiya dur bala hai

kya nam husain ibn-e-'ali nam-e-KHuda hai

har daur ka darman hai wo har dukh ki dawa hai

akbar se jawan beTe ka wo dagh laga hai

'abbas 'alam-dar kamar toD gaya hai

us par bhi ye allāh ri aain-e-wafa hai

har haal mein shakir hai na shikwa na gila hai

ek sabr ka banda hai ki raazi ba-raza hai

mazlum hai bekas hai gharib-ul-ghurba hai

ek paikar-e-ta’at hai ki taswir-e-wafa hai

chup-chap zamana ki hawa dekh raha hai

har haal mein shakir hai na shikwa na gila hai

ek sabr ka banda hai ki raazi ba-raza hai

Darta hai bahadur kahin afwaj-e-duni se

aankhen wo laDa leta hai nezon ki ani se

maidan koi le to le maidan ke dhani se

bai’at ki talab aur imam-e-madni se

ek baD hai sharabi ki ye hazyan hua hai

waqif nahin kya martaba-e-panjatani se

aata nahin kyun baz bhala bad-suKHani se

jate rahe kya hosh bhi aa'za-shikani se

bai’at ki talab aur imam-e-madni se

ek baD hai sharabi ki ye hazyan hua hai

dam-bhar ki numaish hai ye sab jalwa-numai

baqi jo rahegi to wahi shan-e-KHudai

kis baat pe naKHwat hai ye kya dil mein hai aai

duniya ke liye malik-e-’uqba se laDai

duniya ki hukumat to ye do din ki hawa hai

anjam dikha den yahin har dushman-e-din ko

chakra den ishaaron hi mein us charKH-e-barin ko

aa'da pe ulaT den abhi maqtal ki zamin ko

wo chahen to finnar karen fauj-e-la'in ko

wo malik-e-kul hain unhen dushwar hi kya hai

gustaKHiyan ye baadshah-e-’arsh-e-nashin se

kam-baKHt phira jata hai kyun qibla-e-din se

dozaKH ke bana Dale hain saman yahin se

itna to koi puchh le us shimr-e-la’in se

zalim tujhe kuchh pas-e-nabi KHauf-e-KHuda hai

ye nazish-e-qudrat hai ye hai haq ki sadaqat

ye fakHr-e-imamat hai yahi jaan-e-kHilafat

kam hogi qayamat se na kuchh us ki shahadat

zalim tujhe ma'lum hai shabbir ki 'azmat

ye us ka nawasa hai jo mahbub-e-KHuda hai

kHushnudi-e-kHaliq ke talab-gar hain maula

didar ki rahmat ke KHaridar hain maula

har rasm-e-mohabbat se KHabar-dar hain maula

jaan dene ko sau jaan se tayyar hain maula

har haal mein raazi hain ye aain-e-wafa hai

han zauq-e-shahadat ki hai tauqir nirali

peshani-e-ta’at ki hai tanwir nirali

ta’lim-e-risalat ki hai tasir nirali

takmil-e-shahadat ki hai taswir nirali

KHam hai sar-e-taslim ki maula ki raza hai

Dar hai ki bapa aur hi kohram na ho jae

aaghaz jise kahte hain anjam na ho jae

us subh-e-qayamat ki yahin sham na ho jae

mahshar bhi kahin qatl-gah-e-’am na ho jae

kHun-e-shah-e-mazlum hai KHud bol uTha hai

jis waqt asiron ko nazar aaya madina

kuchh kah nahin sakta jo qayamat hui barpa

har bibi ke lab par thi sada ya-shah-e-batha

fariyaad ki taraj hua gulshan-e-zahra

sadat ka ye qafila ghurbat mein luTa hai

chehra bhi hai maghmum to aankhen bhi hain pur-nam

har sans ki aawaz mein hai nala-e-paiham

'arif se chhupaoge kahan tak alam-o-gham

sar dhunte hue baiThe hue kaisa hai ye matam

kyun gham ki chaDhai hai 'KHalil' aaj ye kya hai