کعبے میں بس گیا ہے صنم کس کے واسطے

کعبے میں بس گیا ہے صنم کس کے واسطے

خود بت کدہ بنا ہے حرم کس کے واسطے

ہے دل دہی میں کس کی مرا قلب مضطرب

سرعت میں ہر نفس ہے یہ دم کس کے واسطے

نشو نما ہمارا اگر ہے فنا کے بعد

پیدا ہوا ہے ملک عدم کس کے واسطے

تخم زمین ہے اپنا تنِ زار ایک روز

کہیے کہ ہیں یہ ناز و نعم کس کے واسطے

سر و آہ کر کے روتے ہیں ہو ہو کے زرد رو

ہے عاشقوں کو درد و الم کس کے واسطے

جو کچھ تھی سر نوشت وہ سب ختم ہو چکی

باقی رہے ہیں لوح و قلم کس کے واسطے

تحقیق کر لو آپ ہی اپنے سے پوچھ کر

اس جا عدم سے آئے ہیں ہم کس کے واسطے

گر باغبان لم یزلی کو نہیں ہے حرص

سر سبز ہے یہ باغ ارم کس کے واسطے

عشاق چل رہے ہیں جو ہر دم قدم کی راہ

خو اٹھ رہے ہیں ان کے قدم کس کے واسطے

موج و حباب و قطرۂ و گرداب بن کے خود

مخلوق پر محیط ہے ہم کس کے واسطے

ہے عاشقوں کو سورہ اخلاص کا جو ورد

ہر اک نفس ہے ان کا یہ ضم کس کے واسطے

عاشقؔ نہ ہوتے خواجۂ چشتی کے ہم اگر

آتا جہاں میں فضل و کرم کس کے واسطے