KHalwat mein aa ke dekh KHuda hai hamare pas

ḳhalvat meñ aa ke dekh ḳhudā hai hamāre paas

haq ko na DhūñDh tū vo chhupā hai hamāre paas

āzār-e-'ishq kā ho masīhā se kab 'ilāj

jald aa marīz us kī davā hai hamāre paas

vājib hai ā.īna to banā mumkin us kā aks

hai ā.īna safā to jilā hai hamāre paas

ghūñT jo muñh pe Daal kar aa.e ho ai sanam

sābit tumhārā nāz-o-adā hai hamāre paas

hastī miTā kar apnī vujūd nigār meñ

ham ho ga.e fanā to baqā hai hamāre paas

har dam nasīb ham ko mulāqāt-e-yār hai

ḳhud vasl meñ haiñ māh-laqā hai hamāre paas

mā'būd meñ miTā de tirī 'abadiyat ko saaf

dikhlānā ḳhud ko jurm-o-ḳhatā hai hamāre paas

ātish se 'ishq kī jo jigar hai jalā huā

do din kī ziist kī ye ġhizā hai hamāre paas

jab 'ishq meñ sanam ke kiyā kufr iḳhtiyār

ham but-parast haiñ ye ravā hai hamāre paas

gar tujh ko mahviyat kī shahādat kā zauq hai

hur ban kar aa to karb-o-balā hai hamāre paas

ham ho ga.e fanā terī ulfat meñ ai sanam

hai tujh meñ gar jafā to vafā hai hamāre paas

ayyūb ko nasīb thā kab dard 'ishq kā

sābir haiñ ham faqīr razā hai hamāre paas

aa.e haiñ ham 'adam se pahan kar libās-e-'ūr

'uryānī apnī 'ain hayā hai hamāre paas

laatā hai iltijā koī aur koī mudda'ā

jab se vo mustajīb-e-du'ā hai hamāre paas

'āshiq' mu'īn-e-dīn ke ham āzād haiñ faqīr

kahte haiñ jo kuchh aaj bajā hai hamāre paas

KHalwat mein aa ke dekh KHuda hai hamare pas

haq ko na DhunDh tu wo chhupa hai hamare pas

aazar-e-'ishq ka ho masiha se kab 'ilaj

jald aa mariz us ki dawa hai hamare pas

wajib hai aaina to bana mumkin us ka aks

hai aaina safa to jila hai hamare pas

ghunT jo munh pe Dal kar aae ho ai sanam

sabit tumhaara naz-o-ada hai hamare pas

hasti miTa kar apni wujud nigar mein

hum ho gae fana to baqa hai hamare pas

har dam nasib hum ko mulaqat-e-yar hai

KHud wasl mein hain mah-laqa hai hamare pas

ma'bud mein miTa de teri 'abadiyat ko saf

dikhlana KHud ko jurm-o-KHata hai hamare pas

aatish se 'ishq ki jo jigar hai jala hua

do din ki zist ki ye ghiza hai hamare pas

jab 'ishq mein sanam ke kiya kufr iKHtiyar

hum but-parast hain ye rawa hai hamare pas

gar tujh ko mahwiyat ki shahadat ka zauq hai

hur ban kar aa to karb-o-bala hai hamare pas

hum ho gae fana teri ulfat mein ai sanam

hai tujh mein gar jafa to wafa hai hamare pas

ayyub ko nasib tha kab dard 'ishq ka

sabir hain hum faqir raza hai hamare pas

aae hain hum 'adam se pahan kar libas-e-'ur

'uryani apni 'ain haya hai hamare pas

lata hai iltija koi aur koi mudda'a

jab se wo mustajib-e-du'a hai hamare pas

'ashiq' mu'in-e-din ke hum aazad hain faqir

kahte hain jo kuchh aaj baja hai hamare pas