tujhko agar hai ahmad-e-muKHtar ki talash

tujh ko agar hai ahmad-e-muḳhtār kī talāsh

karnī hai pahle haidar-e-karrār kī talāsh

kāfir kī justujū hai na dīñ-dār kī talāsh

dair-o-haram meñ mujh ko hai ik yaar kī talāsh

aayā 'adam se bhes meñ aadam ke jo yahāñ

hai mujh ko ai sanam usī makkār kī talāsh

banda kī zaat meñ hai ḳhudā jab chhupā huā

dar-parda mujh ko hai usī asrār kī talāsh

parda thā ġhairiyat kā jo muusā kī aañkh par

thī koh-e-tūr par use dīdār kī talāsh

hai dard-e-'ishq se jo masīhā ke dil ko josh

hai mujh ko us ke chāra-e-āzād kī talāsh

maiñ bechtā huuñ dil ko jo bāzār-e-'ishq meñ

rahtī hai mujh ko us ke ḳharīdār kī talāsh

nutq-e-nafas ko sun ke zabān ho ga.ī hai band

paa.ī 'abas jo mujh ko hai guftār kī talāsh

be-ḳhud maiñ huā huuñ sharāb-e-tahavvur se

har dam hai mujh ko ḳhāna-e-ḳhumār kī talāsh

tasbīh ko jo rishta-e-ulfat sanam se hai

kā'ba meñ bhī hai shaiḳh ko zunnār kī talāsh

sun kar anal-haq ab bhī zarā haq-rasī par aa

kab qatl ko ravā hai mere dildār kī talāsh

durr-e-yatīm ban ke girā ashk aañkh se

hai yaar ko jo gauhar-e-shahvār kī talāsh

zikr-e-zabān-o-dil se milegā na vo sanam

ai tālibo karo na tum azkār kī talāsh

mahjūr hai tajallī-e-jānāñ kā ḳhvāst-gār

ai vāsilo nahīñ mujhe anvār kī talāsh

apne 'amal pe kis liye zāhid ko naaz hai

rahmat ko terī jab hai gunahgār kī talāsh

ḳhvāja mu'īn-e-dīn kā maiñ 'āshiq' huuñ ramz-dāñ

rahtī hai mujh ko 'ishq ke ash'ār kī talāsh

tujh ko agar hai ahmad-e-muKHtar ki talash

karni hai pahle haidar-e-karrar ki talash

kafir ki justuju hai na din-dar ki talash

dair-o-haram mein mujh ko hai ek yar ki talash

aaya 'adam se bhes mein aadam ke jo yahan

hai mujh ko ai sanam usi makkar ki talash

banda ki zat mein hai KHuda jab chhupa hua

dar-parda mujh ko hai usi asrar ki talash

parda tha ghairiyat ka jo musa ki aankh par

thi koh-e-tur par use didar ki talash

hai dard-e-'ishq se jo masiha ke dil ko josh

hai mujh ko us ke chaara-e-azad ki talash

main bechta hun dil ko jo bazar-e-'ishq mein

rahti hai mujh ko us ke KHaridar ki talash

nutq-e-nafas ko sun ke zaban ho gai hai band

pai 'abas jo mujh ko hai guftar ki talash

be-KHud main hua hun sharab-e-tahawwur se

har dam hai mujh ko KHana-e-KHumar ki talash

tasbih ko jo rishta-e-ulfat sanam se hai

ka'ba mein bhi hai shaiKH ko zunnar ki talash

sun kar anal-haq ab bhi zara haq-rasi par aa

kab qatl ko rawa hai mere dildar ki talash

durr-e-yatim ban ke gira ashk aankh se

hai yar ko jo gauhar-e-shahwar ki talash

zikr-e-zaban-o-dil se milega na wo sanam

ai talibo karo na tum azkar ki talash

mahjur hai tajalli-e-jaanan ka KHwast-gar

ai wasilo nahin mujhe anwar ki talash

apne 'amal pe kis liye zahid ko naz hai

rahmat ko teri jab hai gunahgar ki talash

KHwaja mu'in-e-din ka main 'ashiq' hun ramz-dan

rahti hai mujh ko 'ishq ke ash'ar ki talash