تجھ کو اگر ہے احمدِ مختار کی تلاش

تجھ کو اگر ہے احمدِ مختار کی تلاش

کرنی ہے پہلے حیدرِ کرار کی تلاش

کافر کی جستجو ہے نہ دیندار کی تلاش

دیر و حرم میں مجھ کو ہے اک یار کی تلاش

آیا عدم سے بھیس میں آدم کے جو یہاں

ہے مجھ کو اے صنم اسی مکار کی تلاش

بندہ کی ذات میں ہے خدا جب چھپا ہوا

در پردہ مجھ کو ہے اسی اسرار کی تلاش

پردہ تھا غیریت کا جو موسیٰ کی آنکھ پر

تھی کوہ طور پر اسے دیدار کی تلاش

ہے دردِ عشق سے جو مسیحا کے دل کو جوش

ہے مجھ کو اس کے چارۂ آزاد کی تلاش

میں بیچتا ہوں دل کو جو بازارِ عشق میں

رہتی ہے مجھ کو اس کے خریدار کی تلاش

نطقِ نفس کو سن کے زبان ہو گئی ہے بند

پائی عبث جو مجھ کو ہے گفتار کی تلاش

بیخود میں ہوا ہوں شرابِ طہور سے

ہر دم ہے مجھ کو خانۂ خمار کی تلاش

تسبیح کو جو رشتۂ الفت صنم سے ہے

کعبہ میں بھی ہے شیخ کو زنار کی تلاش

سن کر انا الحق اب بھی ذرا حق رسی پر آ

کب قتل کو روا ہے میرے دلدار کی تلاش

در یتیم بن کے گرا اشک آنکھ سے

ہے یار کو جو گوہرِ شہوار کی تلاش

ذکر زبان و دل سے ملے گا نہ وہ صنم

اے طالبو کرو نہ تم اذکار کی تلاش

محجور ہے تجلیٔ جاناں کا خواست گار

اے واصلو نہیں مجھے انوار کی تلاش

اپنے عمل پہ کس لیے زاید کو ناز ہے

رحمت کو تیری جب ہے گنہگار کی تلاش

خواجہ معین دین کا میں عاشقؔ ہوں رمز داں

رہتی ہے مجھ کو عشق کے اشعار کی تلاش