sanam ke jism mein aa kar nafs ka tar kahte hain

sanam ke jism meñ aa kar nafs kā taar kahte haiñ

barahman ban ke ḳhud gardan meñ ham zunnār rakhte haiñ

jo mūrat ban ke pahuñche haiñ jahāñ ki but-kada meñ ham

sarāsar ḳhud vujūd-e-ahmad-e-muḳhtār rakhte haiñ

hamārā 'ishq hai maz.hab hai sulh-e-kul hai diin apnā

haiñ saare ek aapas meñ na ham takrār rakhte haiñ

jo ham jalvat meñ baiThe haiñ hai ḳhalvat saath hī apne

baġhal meñ zāhir-o-poshīda ham dil-dār rakhte haiñ

sar-e-mashriq se maġhrib tak jo nāzir aap haiñ apne

munavvar ainamā se mus.haf-e-ruḳhsār rakhte haiñ

hamārī chashm kī putlī ke nuqta meñ hai ḳhud lailā

nazar kī ban ke majnūñ ham nigāh-e-yār rakhte haiñ

nazar kis ko kareñ ab ham haiñ aap hī vāmiq-o-'azrā

ki vahdat meñ na mutlaq ḳhvāhish-e-dīdār rakhte haiñ

ḳhudā ḳhud shash-jihat se hai sadā hairat-kada apnā

pare ham lā-makān ke haiñ kahāñ dīvār rakhte haiñ

banā kar shakl yūsuf kī ḳhudā ko jab se bechā hai

tabhī se 'ishq kā saudā sar-e-bāzār rakhte haiñ

nazar meñ apnī har ik shab tasavvur un kā rahtā hai

jo band aañkh apnī karte haiñ dil bedār rakhte haiñ

vahī mansūr haiñ ham bhī anal-haq kahte jā.eñge

chaḌheñge phir bhī suulī par na ḳhauf-e-vār rakhte haiñ

jo bahre ban ke sunte haiñ baġhair az taar saut-e-hū

banā kar rauzan dil se nai-e-mizmār rakhte haiñ

dikhā dete haiñ gum kar ke usī qālib meñ aadam ko

ham al-insāno sirrīyun haiñ baḌā asrār rakhte haiñ

banā hai jab.ha hastī kā ta’ashshuq se jo 'ālam meñ

sazā sar āla-e-nāsūt par dastār rakhte haiñ

na ho kyuuñ barzaḳh kubrā kā ham ko ḳhaas dā'va yahāñ

sarāpā miim ke nuqta se ham anvār rakhte haiñ

milā hai vasl kā jar'a jo ham ko sāġhar-e-dil se

mai-e-vahdat se āñkheñ ham sadā sarshār rakhte haiñ

kalām apnī sifat hai jo zabān chaltī hai ḳhud is se

raheñ ḳhāmosh kyuuñ kar ham lab-e-guftār rakhte haiñ

mu'īnuddīn chishtī ke jo kahlāte haiñ ham 'āshiq

jahāñ meñ ḳhaas ’ishq-e-haidar-e-karrār rakhte haiñ

sanam ke jism mein aa kar nafs ka tar kahte hain

barahman ban ke KHud gardan mein hum zunnar rakhte hain

jo murat ban ke pahunche hain jahan ki but-kada mein hum

sarasar KHud wujud-e-ahmad-e-muKHtar rakhte hain

hamara 'ishq hai mazhab hai sulh-e-kul hai din apna

hain sare ek aapas mein na hum takrar rakhte hain

jo hum jalwat mein baiThe hain hai KHalwat sath hi apne

baghal mein zahir-o-poshida hum dil-dar rakhte hain

sar-e-mashriq se maghrib tak jo nazir aap hain apne

munawwar ainama se mushaf-e-ruKHsar rakhte hain

hamari chashm ki putli ke nuqta mein hai KHud laila

nazar ki ban ke majnun hum nigah-e-yar rakhte hain

nazar kis ko karen ab hum hain aap hi wamiq-o-'azra

ki wahdat mein na mutlaq KHwahish-e-didar rakhte hain

KHuda KHud shash-jihat se hai sada hairat-kada apna

pare hum la-makan ke hain kahan diwar rakhte hain

bana kar shakl yusuf ki KHuda ko jab se becha hai

tabhi se 'ishq ka sauda sar-e-bazar rakhte hain

nazar mein apni har ek shab tasawwur un ka rahta hai

jo band aankh apni karte hain dil bedar rakhte hain

wahi mansur hain hum bhi anal-haq kahte jaenge

chaDhenge phir bhi suli par na KHauf-e-war rakhte hain

jo bahre ban ke sunte hain baghair az tar saut-e-hu

bana kar rauzan dil se nai-e-mizmar rakhte hain

dikha dete hain gum kar ke usi qalib mein aadam ko

hum al-insano sirriyun hain baDa asrar rakhte hain

bana hai jabha hasti ka ta’ashshuq se jo 'alam mein

saza sar aala-e-nasut par dastar rakhte hain

na ho kyun barzaKH kubra ka hum ko KHas da'wa yahan

sarapa mim ke nuqta se hum anwar rakhte hain

mila hai wasl ka jar'a jo hum ko saghar-e-dil se

mai-e-wahdat se aankhen hum sada sarshaar rakhte hain

kalam apni sifat hai jo zaban chalti hai KHud is se

rahen KHamosh kyun kar hum lab-e-guftar rakhte hain

mu'inuddin chishti ke jo kahlate hain hum 'ashiq

jahan mein KHas ’ishq-e-haidar-e-karrar rakhte hain