ye dil ab sanam se laga chahta hai

ye dil ab sanam se lagā chāhtā hai

ḳhudā raam apnā huā chāhtā hai

qadam kī nazar aatī hai raah sīdhī

qadam apnā dam meñ uThā chāhtā hai

huā 'āshiqī se yahī mujh ko hāsil

ki barbād 'ishq ab kiyā chāhtā hai

hai sīmāb ḳhud tālib-e-'aks dilbar

jo ā.īna par ab chaḌhā chāhtā hai

huā jab ki tuḳhm-e-zamīñ jism faanī

tab us gul se sabza ugā chāhtā hai

nihāñ burj-e-vahdat meñ hai nuur mutlaq

qamar abr meñ ḳhud chhupā chāhtā hai

samajh le ye ai shaiḳh sajda se pahle

ki sar kis ke aage jhukā chāhtā hai

banā māh-e-nau hai ḳhud abru-e-jānāñ

ye nāḳhun se 'uqda khulā chāhtā hai

mujhe 'ishq phuslā ke laayā 'adam se

burā ho jo us kā bhalā chāhtā hai

chhupātā hai tasbīh meñ shaiḳh zunnār

musalmāñ bhī hindu banā chāhtā hai

hijāb uTh gayā vasl meñ jabki dil se

sanam mujh se har dam milā chāhtā hai

hai tambūra-e-sar meñ āvāz-e-mutlaq

dil us kā hī naġhma sunā chāhtā hai

maiñ ai kHvāja-e-chisht 'āshiq' huuñ terā

har ik mujh ko shāh-o-gadā chāhtā hai

ye dil ab sanam se laga chahta hai

KHuda ram apna hua chahta hai

qadam ki nazar aati hai rah sidhi

qadam apna dam mein uTha chahta hai

hua 'ashiqi se yahi mujh ko hasil

ki barbaad 'ishq ab kiya chahta hai

hai simab KHud talib-e-'aks dilbar

jo aaina par ab chaDha chahta hai

hua jab ki tuKHm-e-zamin jism fani

tab us gul se sabza uga chahta hai

nihan burj-e-wahdat mein hai nur mutlaq

qamar abr mein KHud chhupa chahta hai

samajh le ye ai shaiKH sajda se pahle

ki sar kis ke aage jhuka chahta hai

bana mah-e-nau hai KHud abru-e-jaanan

ye naKHun se 'uqda khula chahta hai

mujhe 'ishq phusla ke laya 'adam se

bura ho jo us ka bhala chahta hai

chhupata hai tasbih mein shaiKH zunnar

musalman bhi hindu bana chahta hai

hijab uTh gaya wasl mein jabki dil se

sanam mujh se har dam mila chahta hai

hai tambura-e-sar mein aawaz-e-mutlaq

dil us ka hi naghma suna chahta hai

main ai kHwaja-e-chisht 'ashiq' hun tera

har ek mujh ko shah-o-gada chahta hai