hum apne siwa ghair ko sajda nahin karte

ham apne sivā ġhair ko sajda nahīñ karte

kuchh apne baġhair aur ko paayā nahīñ karte

ik taur pe jab rahtī nahīñ apnī tabī'at

kis haal meñ ham rahte haiñ samjhā nahīñ karte

ham aap hoñ jab ek to dīdār ho kis kā

kyuuñ apne ko phir aap hī dekhā nahīñ karte

jab madd-e-nazar hī nahīñ tasvīr-e-misālī

kyuuñ ā.īna-e-dil ko musaffā nahīñ karte

zāhir meñ to milne se hijāb aatā hai ham ko

parde meñ chale aao to parda nahīñ karte

takfīr meñ zāhid na hamārī ho to kāfir

aap apne sivā ġhair ko puujā nahīñ karte

bad-kār hameñ kahtī hai maḳhlūq to kah le

jo kuchh ki ham ab karte haiñ be-jā nahīñ karte

mastoñ se agar pūchheñ to 'uqda khule us kā

be-ḳhud jo rahā karte haiñ kyā-kyā nahīñ karte

'āshiq tire kahlāte haiñ ai kHvāja-e-chishtī

jo kuchh hai tū hai aur kī parvā nahīñ karte

hum apne siwa ghair ko sajda nahin karte

kuchh apne baghair aur ko paya nahin karte

ek taur pe jab rahti nahin apni tabi'at

kis haal mein hum rahte hain samjha nahin karte

hum aap hon jab ek to didar ho kis ka

kyun apne ko phir aap hi dekha nahin karte

jab madd-e-nazar hi nahin taswir-e-misali

kyun aaina-e-dil ko musaffa nahin karte

zahir mein to milne se hijab aata hai hum ko

parde mein chale aao to parda nahin karte

takfir mein zahid na hamari ho to kafir

aap apne siwa ghair ko puja nahin karte

bad-kar hamein kahti hai maKHluq to kah le

jo kuchh ki hum ab karte hain be-ja nahin karte

maston se agar puchhen to 'uqda khule us ka

be-KHud jo raha karte hain kya-kya nahin karte

'ashiq tere kahlate hain ai kHwaja-e-chishti

jo kuchh hai tu hai aur ki parwa nahin karte