ہم اپنے سوا غیر کو سجدہ نہیں کرتے

ہم اپنے سوا غیر کو سجدہ نہیں کرتے

کچھ اپنے بغیر اور کو پایا نہیں کرتے

اک طور پہ جب رہتی نہیں اپنی طبیعت

کس حال میں ہم رہتے ہیں سمجھا نہیں کرتے

ہم آپ ہوں جب ایک تو دیدار ہو کس کا

کیوں اپنے کو پھر آپ ہی دیکھا نہیں کرتے

جب مد نظر ہی نہیں تصویر مثالی

کیوں آئینہ دل کو مصفا نہیں کرتے

ظاہر میں تو ملنے سے حجاب آتا ہے ہم کو

پردے میں چلے آؤ تو پردہ نہیں کرتے

تکفیر میں زاہد نہ ہماری ہو تو کافر

آپ اپنے سوا غیر کو پوجا نہیں کرتے

بدکار ہمیں کہتی ہے مخلوق تو کہہ لے

جو کچھ کہ ہم اب کرتے ہیں بیجا نہیں کرتے

مستوں سے اگر پوچھیں تو عقدہ کھلے اس کا

بیخود جو رہا کرتے ہیں کیا کیا نہیں کرتے

عاشقؔ ترے کہلاتے ہیں اے خواجہ چشتی

جو کچھ ہے تو ہے اور کی پروا نہیں کرتے