dil tapa husn-e-sarmadi ke liye

dil tapā husn-e-sarmadī ke liye

aañkh pur-nam hai phir kisī ke liye

dair-o-kā'ba ko chhoḌ aayā huuñ

ek kāfir kī bandagī ke liye

chashm-e-sāqī kī yaad kaafī hai

hashr tak ek be-ḳhudī ke liye

hoñT āb-e-hayāt se labrez

zaḳhmī rūhoñ kī tishnagī ke liye

hai tasavvur meñ husn-e-tāb us kā

shab kī zulmat meñ raushnī ke liye

'umr-bhar ke liye asiir hue

us ko dekhā thā dil-lagī ke liye

misl-e-ḳhushbū huā huuñ āvāra

dar badar ek ajnabī ke liye

ḳhud hī roz-e-alast bachhḌā thā

ab hai be-chain vāpsī ke liye

maqsad-e-zindagī nahīñ mā'lūm

jī rahā huuñ ek aadmī ke liye

'ishq bin zindagī nahīñ kuchh bhī

kaash miT jaa.e tū kisī ke liye

mahv-e-isbāt huuñ 'alīmullāh'

us ke har ġhair kī nafī ke liye

dil tapa husn-e-sarmadi ke liye

aankh pur-nam hai phir kisi ke liye

dair-o-ka'ba ko chhoD aaya hun

ek kafir ki bandagi ke liye

chashm-e-saqi ki yaad kafi hai

hashr tak ek be-KHudi ke liye

honT aab-e-hayat se labrez

zaKHmi ruhon ki tishnagi ke liye

hai tasawwur mein husn-e-tab us ka

shab ki zulmat mein raushni ke liye

'umr-bhar ke liye asir hue

us ko dekha tha dil-lagi ke liye

misl-e-KHushbu hua hun aawara

dar badar ek ajnabi ke liye

KHud hi roz-e-alast bachhDa tha

ab hai be-chain wapsi ke liye

maqsad-e-zindagi nahin ma'lum

ji raha hun ek aadmi ke liye

'ishq bin zindagi nahin kuchh bhi

kash miT jae tu kisi ke liye

mahw-e-isbaat hun 'alimullah'

us ke har ghair ki nafi ke liye