منزل ہے پیچھے اور چلا جا رہا ہوں میں

منزل ہے پیچھے اور چلا جا رہا ہوں میں

ہر گام پر فریب ہوس کھا رہا ہوں میں

اک حسن برق پاش ادھر اور ادھر شراب

دانستہ تلخیوں میں گھرا جا رہا ہوں میں

منزل ہے میری عرش کی منزل کے اس طرف

اس پستیٔ نگاہ پہ شرما رہا ہوں میں

جام شراب ہاتھ میں پہلو میں آفتاب

دنیائے کیف و نور پہ لہرا رہا ہوں میں

یہ کس نے غم کا روگ عطا کر دیا مجھے

سینے میں حسرتوں کو جواں پا رہا ہوں میں

کھو گیا تھا ان کی نگاہوں کے آس پاس

نیندوں کی وادیوں سے چلا آ رہا ہوں میں

الطافؔ داستان محبت ہے اور آنکھ

خاموش ہے زبان کہے جا رہا ہوں میں