یہ بھری بزم یہ احباب کہاں پھر ہوں گے

یہ بھری بزم یہ احباب کہاں پھر ہوں گے

دل کے بہلانے کے اسباب کہاں پھر ہوں گے

نکہت و نور میں ڈوبی ہوئی راتو افسوس

یہ فسوں کارو حسیں خواب کہاں پھر ہوں گے

تیرہ بختی مجھے آغوش میں لے گی بڑھ کر

جلوہ ہائے رخ مہتاب کہاں پھر ہوں گے

میں پڑا ہوں گا کہیں دور بیابانوں میں

میرے ساتھی میرے احباب کہاں پھر ہوں گے

ایک برباد جوانی پہ جو روئے برسوں

آہ وہ دیدۂ پر آب کہاں پھر ہوں گے

موت کے سرد دھندلکوں میں اتر جاوں گا

زندگانی کے یہ اسباب کہاں پھر ہوں گے

اب مری یاد میں الطافؔ جو خوں روتے ہیں

مجھ سے ملنے کو وہ بے تاب کہاں پھر ہوں گے