kyun ishq ke da’wedar bane jab zabt ka yara ho na saka

kyuuñ 'ishq ke dā’vedār bane jab zabt kā yaarā ho na sakā

us rū-e-munavvar kā ham se ik lamha nazārā ho na sakā

sab hosh-o-havās-o-’aql-o-kHirad kho baiThe haiñ tere kūche meñ

jis dil pe hameñ thā naaz bahut vo dil bhī hamārā ho na sakā

ye nazar-e-'ināyat lutf-o-karam sarkār ne qadmoñ meñ rakkhā

duniyā ne nazar-andāz kiyā aaqā se gavārā ho na sakā

tūfāñ ke thapeḌe khā-khā kar kashtī thī bhañvar meñ Duub chalī

ik yaad terī ne kaam kiyā aur koī sahārā ho na sakā

koh-e-tūr bhī jal kar ḳhaak huā chamkī jo ziyā-e-husn-e-nabī

muusā se taqāzā aaj talak arinī kā dobāra ho na sakā

tujh ko ho mubārak ai vā'iz kā'ba kī ziyārat laakh dafa

jis but kī badaulat kufr milā us but se kinārā ho na sakā

ākHir ko ‘amīr’-e-sābarī ne Thānī ye tere milne ke liye

marne ke sivā chaukhaT pe terī aur koī bhī chārā ho na sakā

kyun 'ishq ke da’wedar bane jab zabt ka yara ho na saka

us ru-e-munawwar ka hum se ek lamha nazara ho na saka

sab hosh-o-hawas-o-’aql-o-kHirad kho baiThe hain tere kuche mein

jis dil pe hamein tha naz bahut wo dil bhi hamara ho na saka

ye nazar-e-'inayat lutf-o-karam sarkar ne qadmon mein rakkha

duniya ne nazar-andaz kiya aaqa se gawara ho na saka

tufan ke thapeDe kha-kha kar kashti thi bhanwar mein Dub chali

ek yaad teri ne kaam kiya aur koi sahaara ho na saka

koh-e-tur bhi jal kar KHak hua chamki jo ziya-e-husn-e-nabi

musa se taqaza aaj talak arini ka dobara ho na saka

tujh ko ho mubarak ai wa'iz ka'ba ki ziyarat lakh dafa

jis but ki badaulat kufr mila us but se kinara ho na saka

aakHir ko ‘amir’-e-sabari ne Thani ye tere milne ke liye

marne ke siwa chaukhaT pe teri aur koi bhi chaara ho na saka