tir khane ki hawas hai to jigar paida kar

tiir khāne kī havas hai to jigar paidā kar

sarfaroshī kī tamannā hai to sar paidā kar

kohkan koh-kanī sheva-e-ushshāq nahīñ

hai jo āshiq dil-e-ma.ashūq meñ ghar paidā kar

rañg chāhe agar us baaġh meñ āzādī kā

nik.hat-e-gul kī tarah shauq-e-safar paidā kar

qatra-e-ashk bane gauhar-e-gosh-e-jāñāñ

aabrū itnī to ai dīda-e-tar paidā kar

uḌ chalegā abhī ai yaar zarā baal to khol

tujh ko banñā hai parī-zād to par paidā kar

kaun sī jā hai jahāñ jalva-e-ma.ashūq nahīñ

shauq-e-dīdār agar hai to nazar paidā kar

mere hī dil pe gire kaash ye bijlī ban kar

ai falak aah meñ itnā hī asar paidā kar

āḳhirat meñ amal nek hī kaam ā.eñge

pesh hai tujh ko safar zād-e-safar paidā kar

ishq-e-husn-e-namkīn kā jo uThānā hai mazā

pahle kuchh zā.iqa-e-zakHm-e-jigar paidā kar

apnī gardish pe bahut hai tujhe ai charḳh ghamanD

jab maiñ jānūñ ki shab-e-ġham kī sahar paidā kar

sadme ulfat ke uThāne haiñ ilāhī mushkil

dil agar ek diyā laakh jigar paidā kar

ishq-bāzī kā agar hausla rakhtā hai 'amīr'

dil jo lohe kā to patthar kā jigar paidā kar

tir khane ki hawas hai to jigar paida kar

sarfaroshi ki tamanna hai to sar paida kar

kohkan koh-kani shewa-e-ushshaq nahin

hai jo aashiq dil-e-mashuq mein ghar paida kar

rang chahe agar us bagh mein aazadi ka

nikhat-e-gul ki tarah shauq-e-safar paida kar

qatra-e-ashk bane gauhar-e-gosh-e-jaanan

aabru itni to ai dida-e-tar paida kar

uD chalega abhi ai yar zara baal to khol

tujh ko banna hai pari-zad to par paida kar

kaun si ja hai jahan jalwa-e-mashuq nahin

shauq-e-didar agar hai to nazar paida kar

mere hi dil pe gire kash ye bijli ban kar

ai falak aah mein itna hi asar paida kar

aaKHirat mein amal nek hi kaam aaenge

pesh hai tujh ko safar zad-e-safar paida kar

ishq-e-husn-e-namkin ka jo uThana hai maza

pahle kuchh zaiqa-e-zakHm-e-jigar paida kar

apni gardish pe bahut hai tujhe ai charKH ghamanD

jab main jaanun ki shab-e-gham ki sahar paida kar

sadme ulfat ke uThane hain ilahi mushkil

dil agar ek diya lakh jigar paida kar

ishq-bazi ka agar hausla rakhta hai 'amir'

dil jo lohe ka to patthar ka jigar paida kar