mila nam-e-KHuda wo martaba tujhko hasin hokar

milā nām-e-ḳhudā vo martaba tujh ko hasīñ hokar

falak karatā hai mujrā terī chaukhaT ko zamīñ hokar

bachegī aabrū duniyā meñ to uzlat-nashīñ hokar

sadaf meñ baiTh rahnā chāhiye durr-e-samīñ hokar

ḳharāsh-e-ġham ne kaisā mere dil kā rañg chamkāyā

ziyāda ho gayā qīmat meñ kunda ye nagīñ hokar

kalejā taḳhta sausan kā banā hai niile dāġhoñ se

ġhazab kī lī haiñ dil meñ chuTkiyāñ pahlū-nashīñ hokar

kamar ko baal jab maiñ ne kahā jhuñjhlā ke farmāyā

na samjhe aap moTī baat bhī bārīk-bīñ hokar

baḌā hī faḳhr qāsid ko huā ḳhat pā ke Dartā huuñ

falak par uḌ na jaa.e ye kahīñ rūh-ul-amīñ hokar

tasavvur hai vahī pesh-e-nazar har dam hasīnoñ kā

tamāshā hai rah-e-mahfil meñ ham ḳhalvat-nashīñ hokar

kamar hai baal sī ai gul-badan lachke na chalne meñ

na itnā chāhiye mūbāf bhārī nāznīñ hokar

batā de ai falak tuuhī ta.ajjub ham ko aatā hai

ki ḳhush hotā hai phir kyuuñ koī andohgīñ hokar

bahār-e-lāla-o-gul phir kabhī kaahe ko dekheñge

chale haiñ is chaman se ham nigāh-e-vāpsīñ hokar

malūñ jis dam maiñ āñkheñ un ke saa.id se dam-e-ruḳhsat

to rah jaanā vahīñ ai parda-e-chashm āstīñ hokar

jo dil bhī mehrbāñ ho kab zabāñ hai un ke qaabū meñ

jo lab tak haañ bhī aatī hai nikaltī hai nahīñ hokar

lagāyā to gale se par lagā.ī teġh bhī us ne

milā to ii.d ke din vo magar chiiñ bar-jabīñ hokar

ḳhudā momin kī sūrat rizq kāfir ko bhī detā hai

kisī ko bhuul jaa.e kyā vo rabbul-ālamīñ hokar

jagah pakḌī hai kyuuñ sunñe meñ dil ne is se kyā hāsil

kisī añgushtarī meñ is ko rahnā thā nagīñ hokar

tasavvur bañdh gayā jis shaam ko us hūr-tal.at kā

to aayā ḳhvāb āñkhoñ meñ parī ban kar hasīñ hokar

'amīr' ik ā.īna-ḳhāna thā duniyā jis ko kahte haiñ

vahī sūrat rahī pesh-e-nazar niklī kahīñ hokar

mila nam-e-KHuda wo martaba tujh ko hasin hokar

falak karata hai mujra teri chaukhaT ko zamin hokar

bachegi aabru duniya mein to uzlat-nashin hokar

sadaf mein baiTh rahna chahiye durr-e-samin hokar

KHarash-e-gham ne kaisa mere dil ka rang chamkaya

ziyaada ho gaya qimat mein kunda ye nagin hokar

kaleja taKHta sausan ka bana hai nile daghon se

ghazab ki li hain dil mein chuTkiyan pahlu-nashin hokar

kamar ko baal jab main ne kaha jhunjhla ke farmaya

na samjhe aap moTi baat bhi barik-bin hokar

baDa hi faKHr qasid ko hua KHat pa ke Darta hun

falak par uD na jae ye kahin ruh-ul-amin hokar

tasawwur hai wahi pesh-e-nazar har dam hasinon ka

tamasha hai rah-e-mahfil mein hum KHalwat-nashin hokar

kamar hai baal si ai gul-badan lachke na chalne mein

na itna chahiye mubaf bhaari naznin hokar

bata de ai falak tuhi tajjub hum ko aata hai

ki KHush hota hai phir kyun koi andohgin hokar

bahaar-e-lala-o-gul phir kabhi kahe ko dekhenge

chale hain is chaman se hum nigah-e-wapsin hokar

malun jis dam main aankhen un ke said se dam-e-ruKHsat

to rah jaana wahin ai parda-e-chashm aastin hokar

jo dil bhi mehrban ho kab zaban hai un ke qabu mein

jo lab tak han bhi aati hai nikalti hai nahin hokar

lagaya to gale se par lagai tegh bhi us ne

mila to id ke din wo magar chin bar-jabin hokar

KHuda momin ki surat rizq kafir ko bhi deta hai

kisi ko bhul jae kya wo rabbul-alamin hokar

jagah pakDi hai kyun sunne mein dil ne is se kya hasil

kisi angushtari mein is ko rahna tha nagin hokar

tasawwur bandh gaya jis sham ko us hur-talat ka

to aaya KHwab aankhon mein pari ban kar hasin hokar

'amir' ek aaina-KHana tha duniya jis ko kahte hain

wahi surat rahi pesh-e-nazar nikli kahin hokar