ضبط کرنا دل حزیں نہ کہیں

ضبط کرنا دل حزیں نہ کہیں

چوٹ لگ جائے گی کہیں نہ کہیں

جب تڑپتا ہے دل میں ڈرتا ہوں

چرخ پر جا پڑے زمیں نہ کہیں

حوریں لپٹی ہیں نزع میں مجھ سے

دیکھ پائے وہ نازنیں نہ کہیں

وصل کی شب نہیں نہیں کیسی

دیکھ سن لے دل حزیں نہ کہیں

دل میں باتیں بھری تھیں کیا کیا کچھ

ہائے کچھ وقت واپسیں نہ کہیں

دل سے شے لے کے اب تو نکلے ہیں

پوچھ لے گا کوئی کہیں نہ کہیں

نہ تڑپ اس قدر دل بے تاب

سہم جائے وہ نازنیں نہ کہیں

میرے عیسیٰ کے دل میں چبھ جائے

نگہ وقت واپسیں نہ کہیں

چین مردوں کو قبر میں بھی نہیں

آسمان ہو تہ زمیں نہ کہیں

آگ ہو جائے گا وہ شوخ امیرؔ

کھینچنا آہ آتشیں نہ کہیں