dam teri ulfat-e-poshida ka bharne wale

dam tirī ulfat-e-poshida kā bharne vaale

dil jale siina jale uf nahīñ karne vaale

ishq meñ jī se guzarte haiñ guzarne vaale

maut kī raah nahīñ dekhte marne vaale

dāġh-e-dil se mere kahtā hai ye us kā joban

dekh is tarah ubharte haiñ ubharne vaale

bazm-e-mātam meñ kabhī shab hī ko aa jā chhup kar

o mere sog ke parde meñ sañvarne vaale

phir bahār aa.ī hai phir ham ko junūñ hotā hai

kyā din aa.e haiñ farāġhat se guzarne vaale

dīda-o-dil meñ raqīboñ ke base haiñ jā kar

merī āñkhoñ se mere dil meñ utarne vaale

āḳhirī vaqt bhī puurā na kiyā va.ada-e-vasl

aap aate hī rahe mar ga.e marne vaale

phir khichegī mai-e-gul-rañg chaḌheñge nashshe

ḳhoshe añgūr ke rindo haiñ utarne vaale

uTThe aur kūcha-e-mahbūb ko pahuñche āshiq

ye musāfir nahīñ raste meñ Thaharne vaale

baam par khol ke zulfoñ ko vo ḳhud kahte haiñ

rāsta band yahī saañp haiñ karne vaale

bahr-e-hastī meñ jo Duube to adam meñ nikle

paar utar jaate haiñ yuuñ paar utarne vaale

naza.a meñ ham haiñ ġham-e-ishq ye chillātā hai

dekh ġhurbat meñ mujhe chhoḌ na marne vaale

dil-e-be-tāb magar aah koī kī tuune

ro uThe chīñḳh ke kyuuñ baat na karne vaale

ab maze uTTheñge uThtī hai javānī un kī

naḳhl-e-ummīd se do phal haiñ utar ne vaale

kyuuñ raqīboñ se jalūñ maiñ ki ye sab haiñ ai turk

zikr merā tirī sarkār meñ karne vaale

vaqt-e-inkār zabāñ chaltī hai ḳhanjar kī tarah

ḳhuun iqrār kā karte haiñ mukarne vaale

jaan dene ko kahā un se to hañs kar bole

tum salāmat raho har roz ke marne vaale

āb-e-ḳhanjar ko bhī qātil ne mujhe tarsāyā

na diye halq se do ghoñT utarne vaale

murde par murde mazāroñ meñ gaḌeñge tā-hashr

laakh mehmān hoñ ye ghar nahīñ bharne vaale

teġh-o-ḳhanjar se na jhagḌā sar-o-gardan kā miTā

chal diye moḌ ke muñh faisla karne vaale

naza.a meñ kyā nazar aatā hai koī barq-e-jamāl

āñkheñ kar lete haiñ kyuuñ band ye marne vaale

kabhī dāġhoñ ke chaman par bhī nazar hasrat se

o mere phūloñ meñ phūloñ se sañvarne vaale

jab maiñ kahtā huuñ ki martā huuñ to kahtī hai ajal

mar bhī chuk ab kahīñ o roz ke marne vaale

naza.a kā vaqt jo guzrā to ḳhushī kyā is kī

aise sadme abhī kitne haiñ guzarne vaale

āsmāñ par jo sitāre nikal aa.e to 'amīr'

yaad aa.e mujhe daaġh apne ubharne vaale

dam teri ulfat-e-poshida ka bharne wale

dil jale sina jale uf nahin karne wale

ishq mein ji se guzarte hain guzarne wale

maut ki rah nahin dekhte marne wale

dagh-e-dil se mere kahta hai ye us ka joban

dekh is tarah ubharte hain ubharne wale

bazm-e-matam mein kabhi shab hi ko aa ja chhup kar

o mere sog ke parde mein sanwarne wale

phir bahaar aai hai phir hum ko junun hota hai

kya din aae hain faraghat se guzarne wale

dida-o-dil mein raqibon ke base hain ja kar

meri aankhon se mere dil mein utarne wale

aaKHiri waqt bhi pura na kiya wada-e-wasl

aap aate hi rahe mar gae marne wale

phir khichegi mai-e-gul-rang chaDhenge nashshe

KHoshe angur ke rindo hain utarne wale

uTThe aur kucha-e-mahbub ko pahunche aashiq

ye musafir nahin raste mein Thaharne wale

baam par khol ke zulfon ko wo KHud kahte hain

rasta band yahi sanp hain karne wale

bahr-e-hasti mein jo Dube to adam mein nikle

par utar jate hain yun par utarne wale

naza mein hum hain gham-e-ishq ye chillata hai

dekh ghurbat mein mujhe chhoD na marne wale

dil-e-be-tab magar aah koi ki tune

ro uThe chinKH ke kyun baat na karne wale

ab maze uTThenge uThti hai jawani un ki

naKHl-e-ummid se do phal hain utar ne wale

kyun raqibon se jalun main ki ye sab hain ai turk

zikr mera teri sarkar mein karne wale

waqt-e-inkar zaban chalti hai KHanjar ki tarah

KHun iqrar ka karte hain mukarne wale

jaan dene ko kaha un se to hans kar bole

tum salamat raho har roz ke marne wale

aab-e-KHanjar ko bhi qatil ne mujhe tarsaya

na diye halq se do ghonT utarne wale

murde par murde mazaron mein gaDenge ta-hashr

lakh mehman hon ye ghar nahin bharne wale

tegh-o-KHanjar se na jhagDa sar-o-gardan ka miTa

chal diye moD ke munh faisla karne wale

naza mein kya nazar aata hai koi barq-e-jamal

aankhen kar lete hain kyun band ye marne wale

kabhi daghon ke chaman par bhi nazar hasrat se

o mere phulon mein phulon se sanwarne wale

jab main kahta hun ki marta hun to kahti hai ajal

mar bhi chuk ab kahin o roz ke marne wale

naza ka waqt jo guzra to KHushi kya is ki

aise sadme abhi kitne hain guzarne wale

aasman par jo sitare nikal aae to 'amir'

yaad aae mujhe dagh apne ubharne wale