ye kis be-dard kis zalim par apna dam nikalta hai

ye kis be-dard kis zālim par apnā dam nikaltā hai

ye rah rah kar kalejā chuTkiyoñ se kaun maltā hai

tire bīmār kā kaam ab baḌī mushkil se chaltā hai

ki dard uTh kar badalvātā hai tab karvaT badaltā hai

bahār ā-pahuñchī hai shāyad ki dāmān-o-garebāñ meñ

ba-ham ye bahs hai dekheñ ki kaun aage nikaltā hai

zarūr aafat koī aa.ī hai dil par varna ai hamdam

taḌaptā loTtā kyuuñ aañkh se aañsū nikaltā hai

tirā bīmār ai īsā-nafas bigḌā hai ab aisā

sambhālā bhī sambhāle aa ke to vo kab sambhaltā hai

hameñ dhaḌkā hai aisā us ke uTh jaane kā mahfil se

badal jaatā hai rañg apnā jo vo zaanū badaltā hai

hinā kyuuñ dekh kar us ko pisī jaatī hai gulshan meñ

lahū ushshāq kā maltā hai mehñdī kab vo maltā hai

chhiḌakte haiñ vo afshāñ gesūoñ par ḳhair ho dil kī

musāfir chhāoñ meñ tāroñ ke ghar se chal nikaltā hai

ḳhudā bhī ājizoñ kī ājizī suntā hai mahshar meñ

baḌī sarkār meñ darbār meñ ye uzr chaltā hai

rulā detī haiñ hañstī sūrateñ un ḳhūb-rūyoñ kī

ye tifl-e-ashk inhīñ pyāre khilaunoñ par machaltā hai

ye kis kī garmiyoñ se phuñk rahī hai sham.a mahfil meñ

ki parvāna paroñ se shab ko pañkhā roz jhaltā hai

zarā sī jaan hai par dil jigar parvāne kā dekho

ki jaltī aag meñ kis shauq se gir gir ke jaltā hai

jo kahtā huuñ ki merā dam nikaltā hai to kahte haiñ

hamāre vasl kā armān to yūñhī nikaltā hai

tumhārī garmiyāñ aafat haiñ hijr-o-vasl donoñ meñ

koī dozaḳh meñ phuktā hai koī jannat meñ jaltā hai

ajab taqdīr paa.ī hai 'amīr' is dār-e-duniyā ne

nahīñ aatā phir is ghar meñ jo is ghar se nikaltā hai

ye kis be-dard kis zalim par apna dam nikalta hai

ye rah rah kar kaleja chuTkiyon se kaun malta hai

tere bimar ka kaam ab baDi mushkil se chalta hai

ki dard uTh kar badalwata hai tab karwaT badalta hai

bahaar aa-pahunchi hai shayad ki daman-o-gareban mein

ba-ham ye bahs hai dekhen ki kaun aage nikalta hai

zarur aafat koi aai hai dil par warna ai hamdam

taDapta loTta kyun aankh se aansu nikalta hai

tera bimar ai isa-nafas bigDa hai ab aisa

sambhaala bhi sambhaale aa ke to wo kab sambhalta hai

hamein dhaDka hai aisa us ke uTh jaane ka mahfil se

badal jata hai rang apna jo wo zanu badalta hai

hina kyun dekh kar us ko pisi jati hai gulshan mein

lahu ushshaq ka malta hai mehndi kab wo malta hai

chhiDakte hain wo afshan gesuon par KHair ho dil ki

musafir chhaon mein taron ke ghar se chal nikalta hai

KHuda bhi aajizon ki aajizi sunta hai mahshar mein

baDi sarkar mein darbar mein ye uzr chalta hai

rula deti hain hansti suraten un KHub-ruyon ki

ye tifl-e-ashk inhin pyare khilaunon par machalta hai

ye kis ki garmiyon se phunk rahi hai shama mahfil mein

ki parwana paron se shab ko pankha roz jhalta hai

zara si jaan hai par dil jigar parwane ka dekho

ki jalti aag mein kis shauq se gir gir ke jalta hai

jo kahta hun ki mera dam nikalta hai to kahte hain

hamare wasl ka arman to yunhi nikalta hai

tumhaari garmiyan aafat hain hijr-o-wasl donon mein

koi dozaKH mein phukta hai koi jannat mein jalta hai

ajab taqdir pai hai 'amir' is dar-e-duniya ne

nahin aata phir is ghar mein jo is ghar se nikalta hai