achchhe isa ho marizon ka KHayal achchha hai

achchhe iisā ho marīzoñ kā ḳhayāl achchhā hai

ham mare jaate haiñ tum kahte ho haal achchhā hai

aarzū vasl kī achchhī ye ḳhayāl achchhā hai

haa.e puurā nahīñ hotā hai savāl achchhā hai

naza.a meñ maiñ huuñ vo kahte haiñ ki ḳhairiyat hai

phir burā hotā hai kaisā jo ye haal achchhā hai

tujh se māñgūñ maiñ tujhī ko ki sabhī kuchh mil jaa.e

sau savāloñ se yahī ek savāl achchhā hai

yād-e-vasl aa.ī to dil se ye kahā hasrat ne

us ko siine se lagā rakh ye ḳhayāl achchhā hai

ek se ek hasīnoñ meñ hai achchhā lekin

hatthe chaḌh jaa.e jo apnī vahī maal achchhā hai

phuul hoñ ki na hoñ chhāoñ ghanī ho jis meñ

har musāfir kī nazar meñ vo nihāl achchhā hai

dekh le bulbul-o-parvāna kī betābī ko

hijr achchhā na hasīnoñ ko visāl achchhā hai

achchhī hālat pe kisī kī nahīñ rotā koī

āñkheñ kyuuñ rotī haiñ phir dil kā jo haal achchhā hai

tum zabāñ se to burā kahte ho mere dil ko

chitvanoñ kī to suno kahtī haiñ maal achchhā hai

rāteñ achchhī haiñ din achchhe haiñ mahīne achchhe

achchhe ma.ashūq se sohbat ho to saal achchhā hai

donoñ ā.īne haiñ us meñ hai raqīb is meñ habīb

ḳhvāb-e-ma.ashūq se āshiq kā ḳhayāl achchhā hai

chiiz māñge kī ho achchhī bhī to kis masraf kī

ho burā bhī magar apnā ho to maal achchhā hai

chaudhvīñ saal meñ hai nām-e-ḳhudā duḳhtar-e-raz

paḌh de qaazī kaho do bol ye saal achchhā hai

vaa.iz us kī sī adā.eñ to nahīñ hūroñ meñ

ham ne taslīm kiyā husn-o-jamāl achchhā hai

aa gayā us kā tasavvur to pukārā ye shauq

dil meñ jam jaaye ilāhī ye ḳhayāl achchhā hai

jis kā anjām musībat vo ḳhushī bhī hai burī

jis kā anjām ḳhushī ho vo malāl achchhā hai

āñkheñ dikhlāte ho joban to dikhāo sāhib

vo alag bāñdh ke rakhā hai jo maal achchhā hai

vo udhar aks idhar beach meñ hai ā.īna

bahs ye chhiḌ ga.ī hai kis kā jamāl achchhā hai

dahan-e-zaḳhm meñ har qatra-e-ḳhūñ hai yāqūt

terī talvār ke beḌe kā ugaal achchhā hai

māh-e-kāmil mah-e-nau donoñ hasīñ haiñ lekin

ik zarā sun jo hai kam is se hilāl achchhā hai

haa.e buuTā sā vo qadhā.e vo ruḳh vo joban

phuul phal jis ke hoñ achchhe vo nihāl achchhā hai

hasrateñ ḳhuun ke dariyā hī meñ taḌpeñ to bhalī

machhliyoñ ke liye maujoñ hī kā jaal achchhā hai

shoḳhiyāñ vasl meñ kartī haiñ jo dil ko māyūs

sharm detī hai tasallī ki ma.aal achchhā hai

barq agar garmī-e-raftār meñ achchhī hai 'amīr'

garmī-e-husn meñ vo barq-jamāl achchhā hai

achchhe isa ho marizon ka KHayal achchha hai

hum mare jate hain tum kahte ho haal achchha hai

aarzu wasl ki achchhi ye KHayal achchha hai

hae pura nahin hota hai sawal achchha hai

naza mein main hun wo kahte hain ki KHairiyat hai

phir bura hota hai kaisa jo ye haal achchha hai

tujh se mangun main tujhi ko ki sabhi kuchh mil jae

sau sawalon se yahi ek sawal achchha hai

yaad-e-wasl aai to dil se ye kaha hasrat ne

us ko sine se laga rakh ye KHayal achchha hai

ek se ek hasinon mein hai achchha lekin

hatthe chaDh jae jo apni wahi mal achchha hai

phul hon ki na hon chhaon ghani ho jis mein

har musafir ki nazar mein wo nihaal achchha hai

dekh le bulbul-o-parwana ki betabi ko

hijr achchha na hasinon ko visal achchha hai

achchhi haalat pe kisi ki nahin rota koi

aankhen kyun roti hain phir dil ka jo haal achchha hai

tum zaban se to bura kahte ho mere dil ko

chitwanon ki to suno kahti hain mal achchha hai

raaten achchhi hain din achchhe hain mahine achchhe

achchhe mashuq se sohbat ho to sal achchha hai

donon aaine hain us mein hai raqib is mein habib

KHwab-e-mashuq se aashiq ka KHayal achchha hai

chiz mange ki ho achchhi bhi to kis masraf ki

ho bura bhi magar apna ho to mal achchha hai

chaudhwin sal mein hai nam-e-KHuda duKHtar-e-raz

paDh de qazi kaho do bol ye sal achchha hai

waiz us ki si adaen to nahin huron mein

hum ne taslim kiya husn-o-jamal achchha hai

aa gaya us ka tasawwur to pukara ye shauq

dil mein jam jaye ilahi ye KHayal achchha hai

jis ka anjam musibat wo KHushi bhi hai buri

jis ka anjam KHushi ho wo malal achchha hai

aankhen dikhlate ho joban to dikhao sahib

wo alag bandh ke rakha hai jo mal achchha hai

wo udhar aks idhar beach mein hai aaina

bahs ye chhiD gai hai kis ka jamal achchha hai

dahan-e-zaKHm mein har qatra-e-KHun hai yaqut

teri talwar ke beDe ka ugal achchha hai

mah-e-kaamil mah-e-nau donon hasin hain lekin

ek zara sun jo hai kam is se hilal achchha hai

hae buTa sa wo qadhae wo ruKH wo joban

phul phal jis ke hon achchhe wo nihaal achchha hai

hasraten KHun ke dariya hi mein taDpen to bhali

machhliyon ke liye maujon hi ka jal achchha hai

shoKHiyan wasl mein karti hain jo dil ko mayus

sharm deti hai tasalli ki maal achchha hai

barq agar garmi-e-raftar mein achchhi hai 'amir'

garmi-e-husn mein wo barq-jamal achchha hai