اچھے عیسیٰ ہو مریضوں کا خیال اچھا ہے

اچھے عیسیٰ ہو مریضوں کا خیال اچھا ہے

ہم مرے جاتے ہیں تم کہتے ہو حال اچھا ہے

آرزو وصل کی اچھی یہ خیال اچھا ہے

ہائے پورا نہیں ہوتا ہے سوال اچھا ہے

نزع میں میں ہوں وہ کہتے ہیں کہ خیریت ہے

پھر برا ہوتا ہے کیسا جو یہ حال اچھا ہے

تجھ سے مانگوں میں تجھی کو کہ سبھی کچھ مل جائے

سو سوالوں سے یہی ایک سوال اچھا ہے

یاد وصل آئی تو دل سے یہ کہا حسرت نے

اس کو سینے سے لگا رکھ یہ خیال اچھا ہے

ایک سے ایک حسینوں میں ہے اچھا لیکن

ہتھے چڑھ جائے جو اپنی وہی مال اچھا ہے

پھول ہوں کہ نہ ہوں چھاؤں گھنی ہو جس میں

ہر مسافر کی نظر میں وہ نہال اچھا ہے

دیکھ لے بلبل و پروانہ کی بیتابی کو

ہجر اچھا نہ حسینوں کو وصال اچھا ہے

اچھی حالت پہ کسی کی نہیں روتا کوئی

آنکھیں کیوں روتی ہیں پھر دل کا جو حال اچھا ہے

تم زباں سے تو برا کہتے ہو میرے دل کو

چتونوں کی تو سنو کہتی ہیں مال اچھا ہے

راتیں اچھی ہیں دن اچھے ہیں مہینے اچھے

اچھے معشوق سے صحبت ہو تو سال اچھا ہے

دونوں آئینے ہیں اس میں ہے رقیب اس میں حبیب

خواب معشوق سے عاشق کا خیال اچھا ہے

چیز مانگے کی ہو اچھی بھی تو کس مصرف کی

ہو برا بھی مگر اپنا ہو تو مال اچھا ہے

چودھویں سال میں ہے نام خدا دختر رز

پڑھ دے قاضی کہو دو بول یہ سال اچھا ہے

واعظ اس کی سی ادائیں تو نہیں حوروں میں

ہم نے تسلیم کیا حسن و جمال اچھا ہے

آ گیا اس کا تصور تو پکارا یہ شوق

دل میں جم جائے الٰہی یہ خیال اچھا ہے

جس کا انجام مصیبت وہ خوشی بھی ہے بری

جس کا انجام خوشی ہو وہ ملال اچھا ہے

آنکھیں دکھلاتے ہو جوبن تو دکھاؤ صاحب

وہ الگ باندھ کے رکھا ہے جو مال اچھا ہے

وہ ادھر عکس ادھر بیچ میں ہے آئینہ

بحث یہ چھڑ گئی ہے کس کا جمال اچھا ہے

دہن زخم میں ہر قطرۂ خوں ہے یاقوت

تیری تلوار کے بیڑے کا اگال اچھا ہے

ماہ کامل مہ نو دونوں حسیں ہیں لیکن

اک ذرا سن جو ہے کم اس سے ہلال اچھا ہے

ہائے بوٹا سا وہ قدہاے وہ رخ وہ جوبن

پھول پھل جس کے ہوں اچھے وہ نہال اچھا ہے

حسرتیں خون کے دریا ہی میں تڑپیں تو بھلی

مچھلیوں کے لیے موجوں ہی کا جال اچھا ہے

شوخیاں وصل میں کرتی ہیں جو دل کو مایوس

شرم دیتی ہے تسلی کہ مآل اچھا ہے

برق اگر گرمئ رفتار میں اچھی ہے امیرؔ

گرمیٔ حسن میں وہ برق جمال اچھا ہے