phaDak kar murgh-e-bismil ki tarah aashiq jo marte hain

phaḌak kar murġh-e-bismil kī tarah 'āshiq jo marte haiñ

ye maqtal haiñ 'arūs-e-teġh ke sadqe utarte haiñ

lagāte haiñ jo surma ā.īna ko duur dharte haiñ

sitam dekho vo hālat chitvanoñ se aap Darte haiñ

liyā to maiñ ne bosa ḳhanjar-e-qātil kā maqtal meñ

ajal sharmā ga.ī samjhī ki mujh ko pyaar karte haiñ

tasallī ḳhaak ho vā'doñ se un ke chitvaneñ zālim

ishāra se ye kahtī haiñ ki dekho ab mukarte haiñ

chaman kī sair bhī chhūTe to phir jiine se kyā huā

galā kāTeñ mirā sayyād par nāhaq katarte haiñ

bharā hai hasratoñ se dil kahāñ dāġhoñ kī gunjā.ish

ye sab armān haiñ jo daaġh ban ban ke ubharte haiñ

vo sar se paañv tak tasvīr haiñ be-sāḳhta ban ke

sañvarne se bigaḌte haiñ bigaḌne se sañvarte haiñ

tasavvur meñ bhī bosa luuñ to uḌ jaatā hai rañg un kā

balā.eñ ḳhvāb meñ bhī luuñ to baal un ke bikharte haiñ

'amīr' is jaan ke dushman se tum ko Dar nahīñ lagtā

dhaḌalle se tum us ke muñh par kahte ho ki marte haiñ

phaDak kar murgh-e-bismil ki tarah 'ashiq jo marte hain

ye maqtal hain 'arus-e-tegh ke sadqe utarte hain

lagate hain jo surma aaina ko dur dharte hain

sitam dekho wo haalat chitwanon se aap Darte hain

liya to main ne bosa KHanjar-e-qatil ka maqtal mein

ajal sharma gai samjhi ki mujh ko pyar karte hain

tasalli KHak ho wa'don se un ke chitwanen zalim

ishaara se ye kahti hain ki dekho ab mukarte hain

chaman ki sair bhi chhuTe to phir jine se kya hua

gala kaTen mera sayyaad par nahaq katarte hain

bhara hai hasraton se dil kahan daghon ki gunjaish

ye sab arman hain jo dagh ban ban ke ubharte hain

wo sar se panw tak taswir hain be-saKHta ban ke

sanwarne se bigaDte hain bigaDne se sanwarte hain

tasawwur mein bhi bosa lun to uD jata hai rang un ka

balaen KHwab mein bhi lun to baal un ke bikharte hain

'amir' is jaan ke dushman se tum ko Dar nahin lagta

dhaDalle se tum us ke munh par kahte ho ki marte hain