agar KHuda hai to main nahin hun agar hun main to KHuda nahin hai

agar ḳhudā hai to maiñ nahīñ huuñ agar huuñ maiñ to ḳhudā nahīñ hai

hai is qadar tañg rāh-e-ulfat ki is meñ do kī jagah nahīñ

ḳhudā meñ maiñ huuñ ḳhudā hai mujh meñ yahī hai vahdat yahī hai kasrat

yahī kaa.ī kā hai mu'amma isī meñ sab kuchh hai kyā nahīñ hai

binā samajh kar kiyā jo sajda na jaane aa.ī nidā kidhar se

tumheñ mubārak ho aisā sajda hameñ ye sajda ravā nahīñ hai

hai vo 'ibādat maqām-e-'ibrat ki sair jis se na ho tabī'at

na kiije aisī kabhī 'ibādat ki us kā bhūkā ḳhudā nahīñ hai

rah tarīqat meñ aa ke dekho yahīñ pe khulte haiñ rāz-e-bātin

ye yaad rakkho ki us se haT kar koī bhī kāmil huā nahīñ hai

jhukā rahā huuñ maiñ apne sar ko ḳhudā-rā kuchh is kī laaj rakhnā

ye sar vo hai jo ba-juz tumhāre kisī ke aage jhukā nahīñ hai

paḌhā namāzeñ rakhā bhī roza qur.ān kī bhī kiyā tilāvat

magar jo rāz-e-ḳhafī thā 'rizvāñ' banā vo murshid khullā nahīñ hai

agar KHuda hai to main nahin hun agar hun main to KHuda nahin hai

hai is qadar tang rah-e-ulfat ki is mein do ki jagah nahin

KHuda mein main hun KHuda hai mujh mein yahi hai wahdat yahi hai kasrat

yahi kai ka hai mu'amma isi mein sab kuchh hai kya nahin hai

bina samajh kar kiya jo sajda na jaane aai nida kidhar se

tumhein mubarak ho aisa sajda hamein ye sajda rawa nahin hai

hai wo 'ibaadat maqam-e-'ibrat ki sair jis se na ho tabi'at

na kije aisi kabhi 'ibaadat ki us ka bhuka KHuda nahin hai

rah tariqat mein aa ke dekho yahin pe khulte hain raaz-e-baatin

ye yaad rakkho ki us se haT kar koi bhi kaamil hua nahin hai

jhuka raha hun main apne sar ko KHuda-ra kuchh is ki laj rakhna

ye sar wo hai jo ba-juz tumhaare kisi ke aage jhuka nahin hai

paDha namazen rakha bhi roza quran ki bhi kiya tilawat

magar jo raaz-e-KHafi tha 'rizwan' bana wo murshid khulla nahin hai