badal sakti hain kab taqdir-e-alam unki tadbiren

badal saktī haiñ kab taqdīr-e-a.alam un kī tadbīreñ

ḳhudā ke haath meñ ḳhud haiñ ḳhudī vāloñ kī taqdīreñ

ka.e jaa.eñ mujhe tahlīl-e-āzādī kī tadbīreñ

ghuleñge paañv to ḳhud hī utar jā.eñgī zanjīreñ

abhī mahram nahīñ to ashk-o-āh-e-ākHir-e-shab kā

hayāt-afroz haiñ āb-o-havā-e-dil kī tāsīreñ

ye duniyā-e-majāz ā.īnā-kHāna hai haqīqat kā

chhupā kar apnī sūrat pheñk dī haiñ apnī tasvīreñ

mirī ḳhāmoshiyoñ par mujh ko duniyā ta.an detī hai

ye kyā jaane ki chup rah kar bhī kī jaatī haiñ taqrīreñ

ba-qadr-e-fitrat-e-insāniyat 'sīmāb' nādim huuñ

maiñ dānista nahīñ karatā huuñ ho jaatī haiñ taqsīreñ

badal sakti hain kab taqdir-e-alam un ki tadbiren

KHuda ke hath mein KHud hain KHudi walon ki taqdiren

kae jaen mujhe tahlil-e-azadi ki tadbiren

ghulenge panw to KHud hi utar jaengi zanjiren

abhi mahram nahin to ashk-o-ah-e-akHir-e-shab ka

hayat-afroz hain aab-o-hawa-e-dil ki tasiren

ye duniya-e-majaz aaina-kHana hai haqiqat ka

chhupa kar apni surat phenk di hain apni taswiren

meri KHamoshiyon par mujh ko duniya tan deti hai

ye kya jaane ki chup rah kar bhi ki jati hain taqriren

ba-qadr-e-fitrat-e-insaniyat 'simab' nadim hun

main danista nahin karata hun ho jati hain taqsiren