balaen zulf-e-jaanan ki agar lete to hum lete

balā.eñ zulf-e-jānāñ kī agar lete to ham lete

balā ye kaun letā jaan par lete to ham lete

na letā koī saudā mol bāzār-e-mohabbat kā

magar jaañ naqd apnī bech kar lete to ham lete

jo hotā ham se ham-bistar batā phir terā kyā jaatā

taḌap kar karvaTeñ din-rāt gar lete to ham lete

tujhe kyā kaam hai ai be-ḳhabar jo DhūñDhtā phirtā

dil-e-gum-gashta kī apne ḳhabar lete to ham lete

lagāyā jaam hoñToñ se jo us ne ham ko rashk aayā

ki bosa us ke lab kā ai 'zafar' lete to ham lete

balaen zulf-e-jaanan ki agar lete to hum lete

bala ye kaun leta jaan par lete to hum lete

na leta koi sauda mol bazar-e-mohabbat ka

magar jaan naqd apni bech kar lete to hum lete

jo hota hum se ham-bistar bata phir tera kya jata

taDap kar karwaTen din-raat gar lete to hum lete

tujhe kya kaam hai ai be-KHabar jo DhunDhta phirta

dil-e-gum-gashta ki apne KHabar lete to hum lete

lagaya jam honTon se jo us ne hum ko rashk aaya

ki bosa us ke lab ka ai 'zafar' lete to hum lete