بلائیں زلف جاناں کی اگر لیتے تو ہم لیتے

بلائیں زلف جاناں کی اگر لیتے تو ہم لیتے

بلا یہ کون لیتا جان پر لیتے تو ہم لیتے

نہ لیتا کوئی سودا مول بازار محبت کا

مگر جاں نقد اپنی بیچ کر لیتے تو ہم لیتے

جو ہوتا ہم سے ہم بستر بتا پھر تیرا کیا جاتا

تڑپ کر کروٹیں دن رات گر لیتے تو ہم لیتے

تجھے کیا کام ہے اے بے خبر جو ڈھونڈھتا پھرتا

دل گم گشتہ کی اپنے خبر لیتے تو ہم لیتے

لگایا جام ہونٹوں سے جو اس نے ہم کو رشک آیا

کہ بوسہ اس کے لب کا اے ظفرؔ لیتے تو ہم لیتے