damanon ka na pata hai na garebanon ka

dāmanoñ kā na patā hai na garebānoñ kā

hashr kahte haiñ jise shahar hai uryānoñ kā

ghar hai allāh kā ghar be-sar-o-sāmānoñ kā

pāsbānoñ kā yahāñ kaam na darbānoñ kā

kHātir-e-ranj-o-ġham-o-daur se fursat hī nahīñ

mezbāñ ho ke huā maiñ unhīñ mehmānoñ kā

kab kisī aur kī jam saktī hai us par paTrī

tausan-e-nāz hai ḳhud-karda tirī rānoñ kā

gor-e-kisrā-o-farīdūñ pe jo pahuñchūñ pūchhūñ

tum yahāñ sote ho kyā haal hai aivānoñ kā

un ke hukmoñ kī ho ta.amīl kahāñ tak mujh se

Dher saqqoñ kā hai ambār hai parvānoñ kā

kaun gul chehra-e-rañgīñ kā nahīñ dīvāna

baaġh ġhuncha hai tire chaak garebānoñ kā

qaht-e-rozī ye jahāñ meñ hai ki kahte haiñ hunūd

ramazāñ ḳhuub mahīna hai musalmānoñ kā

kyā likheñ yaar ko naama ko naqāhat se yahāñ

fāsla kHāma-o-kāġhaz meñ hai maidānoñ kā

maan.e bāda-kashī mujh ko haiñ nā-haq vaa.iz

ḳharch kyā hotā hai un halq ke darbānoñ kā

sabza ḳhat ne ghaTā dī tire aariz kī bahār

thā jo laale kā chaman khet hai ab dhānoñ kā

hashr meñ qufl bhī rizvāñ ne na kholā thā abhī

jā paḌā ḳhuld meñ Daakā mere armānoñ kā

maujeñ dariyā meñ jo uThtī huī dekhīñ samjhā

ye bhī majma.a hai tire chāk-garebānoñ kā

sunñe vāloñ ke na kis tarah phañseñ tā.ir-e-dil

daam sayyād kā lachhā hai tirī tānoñ kā

arsa-e-hastī-o-tūl-e-shab-e-gor-o-mahshar

buad hai banda-o-rab meñ abhī maidānoñ kā

tiir par tiir lagātā hai kamāñdār-e-falak

ḳhāna-e-dil meñ hujūm aaj hai mehmānoñ kā

dar-e-jānāñ se nikal kar maiñ phañsā zindāñ meñ

gard halqa pai in.aam hai darbānoñ kā

ishq-e-ruḳhsār meñ iqbāl-e-sikandar paayā

ā.īna dast nagar hai tire hairānoñ kā

laal mūbāf sanam gesū-e-shab-gūñ meñ na Daal

ḳhuun ho jā.egā do chaar musalmānoñ kā

toḌ kar bāl-o-par us ke jo banāyā hai chañvar

hai havā ḳhvāh humā tere magas-rānoñ kā

bismiloñ kī dam-e-ruḳhsat hai mudārāt zarūr

zohra paanī huā jaatā hai namak-dānoñ kā

aadmī ġhairoñ ke iġhvā ne na rakhā un ko

khel saarā hai bigāḌā unhīñ shaitānoñ kā

be-ḳhudī aaTh pahar gum ye mujhe rakhtī hai

din ko shab raat ko huuñ ḳhvāb nigahbānoñ kā

mere a.azā ne phañsāyā hai mujhe isyāñ meñ

shikva āñkhoñ kā karūñ yā maiñ gilā kānoñ kā

qadar-dāñ chāhiye dīvān hamārā hai 'amīr'

muntaḳhab 'mus.hafī'-o-'mīr' ke dīvānoñ kā

damanon ka na pata hai na garebanon ka

hashr kahte hain jise shahar hai uryanon ka

ghar hai allah ka ghar be-sar-o-samanon ka

pasbanon ka yahan kaam na darbanon ka

kHatir-e-ranj-o-gham-o-daur se fursat hi nahin

mezban ho ke hua main unhin mehmanon ka

kab kisi aur ki jam sakti hai us par paTri

tausan-e-naz hai KHud-karda teri ranon ka

gor-e-kisra-o-faridun pe jo pahunchun puchhun

tum yahan sote ho kya haal hai aiwanon ka

un ke hukmon ki ho tamil kahan tak mujh se

Dher saqqon ka hai ambar hai parwanon ka

kaun gul chehra-e-rangin ka nahin diwana

bagh ghuncha hai tere chaak garebanon ka

qaht-e-rozi ye jahan mein hai ki kahte hain hunud

ramazan KHub mahina hai musalmanon ka

kya likhen yar ko nama ko naqahat se yahan

fasla kHama-o-kaghaz mein hai maidanon ka

mane baada-kashi mujh ko hain na-haq waiz

KHarch kya hota hai un halq ke darbanon ka

sabza KHat ne ghaTa di tere aariz ki bahaar

tha jo lale ka chaman khet hai ab dhanon ka

hashr mein qufl bhi rizwan ne na khola tha abhi

ja paDa KHuld mein Daka mere armanon ka

maujen dariya mein jo uThti hui dekhin samjha

ye bhi majma hai tere chaak-garebanon ka

sunne walon ke na kis tarah phansen tair-e-dil

dam sayyaad ka lachha hai teri tanon ka

arsa-e-hasti-o-tul-e-shab-e-gor-o-mahshar

buad hai banda-o-rab mein abhi maidanon ka

tir par tir lagata hai kamandar-e-falak

KHana-e-dil mein hujum aaj hai mehmanon ka

dar-e-jaanan se nikal kar main phansa zindan mein

gard halqa pai inam hai darbanon ka

ishq-e-ruKHsar mein iqbaal-e-sikandar paya

aaina dast nagar hai tere hairanon ka

lal mubaf sanam gesu-e-shab-gun mein na Dal

KHun ho jaega do chaar musalmanon ka

toD kar baal-o-par us ke jo banaya hai chanwar

hai hawa KHwah huma tere magas-ranon ka

bismilon ki dam-e-ruKHsat hai mudaraat zarur

zohra pani hua jata hai namak-danon ka

aadmi ghairon ke ighwa ne na rakha un ko

khel sara hai bigaDa unhin shaitanon ka

be-KHudi aaTh pahar gum ye mujhe rakhti hai

din ko shab raat ko hun KHwab nigahbanon ka

mere aaza ne phansaya hai mujhe isyan mein

shikwa aankhon ka karun ya main gila kanon ka

qadar-dan chahiye diwan hamara hai 'amir'

muntaKHab 'mushafi'-o-'mir' ke diwanon ka