yan dil mein KHayal aur hai wan madd-e-nazar aur

yaañ dil meñ ḳhayāl aur hai vaañ madd-e-nazar aur

hai haal tabī’at kā idhar aur udhar aur

har vaqt hai chitvan tirī ai sho.abada gar aur

ik dam meñ mizāj aur hai ik pal meñ nazar aur

nākārah-o-nādān koī mujh sā bhī na hogā

aayā na ba-juz be-hunarī koī hunar aur

dil de ke liyā rañj-o-alam vaa.e rī qismat

ham samjhe the kuchh aur huā haaye magar aur

jiitā na jiye koī bhī jāñ-bar na ho koī

do-chār sitamgār hoñ tere se agar aur

aur aur haiñ aap aap haiñ kyā aap se nisbat

hoñ laakh zamāne meñ agar rashk-e-qamar aur

ai 'dāġh' mai-'ishq se kyā zahar ko nisbat

hai is meñ asar aur vo rakhtā hai asar aur

yan dil mein KHayal aur hai wan madd-e-nazar aur

hai haal tabi’at ka idhar aur udhar aur

har waqt hai chitwan teri ai shoabada gar aur

ek dam mein mizaj aur hai ek pal mein nazar aur

nakarah-o-nadan koi mujh sa bhi na hoga

aaya na ba-juz be-hunari koi hunar aur

dil de ke liya ranj-o-alam wae ri qismat

hum samjhe the kuchh aur hua haye magar aur

jita na jiye koi bhi jaan-bar na ho koi

do-chaar sitamgar hon tere se agar aur

aur aur hain aap aap hain kya aap se nisbat

hon lakh zamane mein agar rashk-e-qamar aur

ai 'dagh' mai-'ishq se kya zahar ko nisbat

hai is mein asar aur wo rakhta hai asar aur