wo jis ki hama-agahi mein har raaz-e-nihan-e-hasti hai

vo jis kī hama-āgāhī meñ har rāz-e-nihān-e-hastī hai

vo jis ke ishāroñ par raqsāñ 'ālam kī bulandī pastī hai

vo jis kī bashāshat rahtī hai har ruuh fazā hariyālī par

vo jis kī sanāyeñ hotī haiñ gulzār meñ Dālī-Dālī par

vo jis ke nafs kī garmī se har ġhuncha-e-rañgīñ khiltā hai

vo jis ke tajallī-ḳhāne se ḳhurshed ko jalva miltā hai

vo jis kā vazīfa karte haiñ kohsār ke be-ḳhud nazzāre

vo jis ke liye sargardāñ haiñ mīsāq ke din se sayyāre

vo jis kī rahmat ke naġhme gaatī hai sabā barsātoñ meñ

vo jis kī latāfat hotī hai sardī kī suhānī rātoñ meñ

vo naam se jis ke chashmoñ meñ tahrīk-e-tarannum hotī hai

vo jis kī shagūfa-zāroñ meñ taqlīd-e-tabassum hotī hai

vo jis kā takallum barbat meñ vo jis kī ḳhamoshī ġhāroñ meñ

vo jis kī jhalak hai bijlī vo jis kī chamak hai tāroñ meñ

vo jis se ziyā.eñ miltī haiñ ummīd kī raḳhshāñ bastī ko

vo jis ne tarāne baḳhshe haiñ har parda-e-sāz-e-hastī ko

vo jis kī ḳhamoshī rātoñ ko bastī hai kushāda galiyoñ meñ

vo jis ke tabassum luTte haiñ gulzār kī kamsin kaliyoñ meñ

vo jis ko saare 'ālam meñ mahbūb shabīh-e-insāñ hai

vo jis ne kiyā paidā tujh ko nādān vahī to yazdāñ hai

wo jis ki hama-agahi mein har raaz-e-nihan-e-hasti hai

wo jis ke ishaaron par raqsan 'alam ki bulandi pasti hai

wo jis ki bashashat rahti hai har ruh faza hariyali par

wo jis ki sanayen hoti hain gulzar mein Dali-Dali par

wo jis ke nafs ki garmi se har ghuncha-e-rangin khilta hai

wo jis ke tajalli-KHane se KHurshed ko jalwa milta hai

wo jis ka wazifa karte hain kohsar ke be-KHud nazzare

wo jis ke liye sargardan hain misaq ke din se sayyare

wo jis ki rahmat ke naghme gati hai saba barsaton mein

wo jis ki latafat hoti hai sardi ki suhani raaton mein

wo nam se jis ke chashmon mein tahrik-e-tarannum hoti hai

wo jis ki shagufa-zaron mein taqlid-e-tabassum hoti hai

wo jis ka takallum barbat mein wo jis ki KHamoshi ghaaron mein

wo jis ki jhalak hai bijli wo jis ki chamak hai taron mein

wo jis se ziyaen milti hain ummid ki raKHshan basti ko

wo jis ne tarane baKHshe hain har parda-e-saz-e-hasti ko

wo jis ki KHamoshi raaton ko basti hai kushada galiyon mein

wo jis ke tabassum luTte hain gulzar ki kamsin kaliyon mein

wo jis ko sare 'alam mein mahbub shabih-e-insan hai

wo jis ne kiya paida tujh ko nadan wahi to yazdan hai