sun ai murli manohar jaan-e-jaan taswir-e-zebai

sun ai murlī manohar jān-e-jāñ tasvīr-e-zebā.ī

jagat mohan hai tū man-mohnī hai terī ra.anā.ī

tirī bansī kī tāneñ muztarib bhagtoñ ke sīnoñ meñ

tire ruḳh se ziyā-pāshī diloñ ke ābgīnoñ meñ

tirī tābāniyāñ haiñ sub.h ke tābinda aḳhtar meñ

tirī shab-rañgiyāñ haiñ shaam kī zulf-e-mu’ambar meñ

tire dāġh-e-siyah se surkH-rū gulshan meñ laala hai

tire afkār se bātin kī mahfil meñ ujālā hai

machaltī haiñ tirī rañgīñ adā.eñ marġh-zāroñ meñ

tirā partav añdherī vādiyoñ meñ kohsāroñ meñ

tire darshan se ab bhī gopiyāñ sarshār rahtī haiñ

tasavvur-kosh rahtī haiñ tabassum-kār rahtī haiñ

tū vo shai hai zamāna tujh se ġhāfil ho nahīñ saktā

tū vo daulat hai tujh ko qalb-e-fitrat kho nahīñ saktā

sun ai murli manohar jaan-e-jaan taswir-e-zebai

jagat mohan hai tu man-mohni hai teri ranai

teri bansi ki tanen muztarib bhagton ke sinon mein

tere ruKH se ziya-pashi dilon ke aabginon mein

teri tabaniyan hain subh ke tabinda aKHtar mein

teri shab-rangiyan hain sham ki zulf-e-mu’ambar mein

tere dagh-e-siyah se surkH-ru gulshan mein lala hai

tere afkar se baatin ki mahfil mein ujala hai

machalti hain teri rangin adaen margh-zaron mein

tera partaw andheri wadiyon mein kohsaron mein

tere darshan se ab bhi gopiyan sarshaar rahti hain

tasawwur-kosh rahti hain tabassum-kar rahti hain

tu wo shai hai zamana tujh se ghafil ho nahin sakta

tu wo daulat hai tujh ko qalb-e-fitrat kho nahin sakta