jab kisi mein tab-e-nazzara nahin pata hai tu

jab kisī meñ tāb-e-nazzāra nahīñ paatā hai tū

kis liye phir sāmne aane se sharmātā hai tū

ḳhvāb meñ jhallā ke tārīkī mire maqsūm kī

chhupne vaale kaun sī chilman meñ chhup jaatā hai tū

āñsuoñ meñ jhilmilātā hai tirā 'aks-e-jamīl

nuur paare dīda-e-giryāñ se barsātā hai tū

sub.h-dam ḳhurshīd kī zarrīñ kiran ke bhes meñ

baaġh kī doshīza kaliyoñ ko hañsā jaatā hai tū

chhāñv meñ tāroñ kī jab dam toḌ detī hai nigāh

kahkashāñ se niiñd ban-ban kar utar aatā hai tū

jab kabhī lagtī hai sāvan meñ ka.ī din kī jhaḌī

vādī-e-dil meñ tajallī ban ke chhā jaatā hai tū

pattī-pattī se sunā karatā huuñ terā zikr-e-ḳhair

sub.h-dam-nāk-e-kHudā kaliyoñ ko chaTkātā hai tū

TimTimāte dekhtā huuñ jab mazāroñ par charāġh

zindagī meñ zindagī kā dard ban jaatā hai tū

Dūbtā hai jab ghane bāġhoñ ke pīchhe āftāb

ban ke sannāTā bayābānoñ pe chhā jaatā hai tū

jab gulābī chāñdnī kartī hai ta.amīr-e-sahar

surḳhiyāñ ban kar lab-e-bām-e-ufuq aatā hai tū

jab ghane jañgal meñ chhā jaate haiñ bādal har taraf

har taraf se dil ke armānoñ ko taḌpātā hai tū

us kī būñdoñ se mas ho kar jo aatī hai nasīm

niiñd ke maate junūñ ko gudgudā jaatā hai tū

roz lachkā kar ufuq par mehar kī pahlī kiran

mere maidān-e-basārat se nikal jaatā hai tū

kyā mirī muztar nigāheñ haiñ tire ruḳh kī naqāb

band kar letā huuñ jab āñkheñ nazar aatā hai tū

sū-e-mashriq nuur ke chashme ubalte dekh kar

yaad karatā huuñ tujhe maiñ yaad aa jaatā hai tū

ab maiñ samjhā tere andāz-e-taġhāful kā sabab

mujh ko dar-parda rumūz-e-'ishq samjhātā hai tū

jab kisi mein tab-e-nazzara nahin pata hai tu

kis liye phir samne aane se sharmata hai tu

KHwab mein jhalla ke tariki mere maqsum ki

chhupne wale kaun si chilman mein chhup jata hai tu

aansuon mein jhilmilata hai tera 'aks-e-jamil

nur pare dida-e-giryan se barsata hai tu

subh-dam KHurshid ki zarrin kiran ke bhes mein

bagh ki doshiza kaliyon ko hansa jata hai tu

chhanw mein taron ki jab dam toD deti hai nigah

kahkashan se nind ban-ban kar utar aata hai tu

jab kabhi lagti hai sawan mein kai din ki jhaDi

wadi-e-dil mein tajalli ban ke chha jata hai tu

patti-patti se suna karata hun tera zikr-e-KHair

subh-dam-nak-e-kHuda kaliyon ko chaTkata hai tu

TimTimate dekhta hun jab mazaron par charagh

zindagi mein zindagi ka dard ban jata hai tu

Dubta hai jab ghane baghon ke pichhe aaftab

ban ke sannaTa bayabanon pe chha jata hai tu

jab gulabi chandni karti hai tamir-e-sahar

surKHiyan ban kar lab-e-baam-e-ufuq aata hai tu

jab ghane jangal mein chha jate hain baadal har taraf

har taraf se dil ke armanon ko taDpata hai tu

us ki bundon se mas ho kar jo aati hai nasim

nind ke mate junun ko gudguda jata hai tu

roz lachka kar ufuq par mehar ki pahli kiran

mere maidan-e-basarat se nikal jata hai tu

kya meri muztar nigahen hain tere ruKH ki naqab

band kar leta hun jab aankhen nazar aata hai tu

su-e-mashriq nur ke chashme ubalte dekh kar

yaad karata hun tujhe main yaad aa jata hai tu

ab main samjha tere andaz-e-taghaful ka sabab

mujh ko dar-parda rumuz-e-'ishq samjhata hai tu