jis ka har zarra nazar aata hai saudai mujhe

jis kā har zarra nazar aatā hai saudā.ī mujhe

kaash mil jaa.e vahī mahbūb-e-harjā.ī mujhe

khīñch kar ka.abe se aksar but-kade meñ le gayā

but-tarāshī meñ kamāl-e-naqsh-e-ārā.ī mujhe

ho gayā mā.il-ba-kHuddārī mirā zauq-e-niyāz

hashr tak rotā rahe zauq-e-jabīñ-sā.ī mujhe

lauh-e-qismat se miTā lene de tahrīr-e-firāq

ham-nashīñ rahne de masrūf-e-jabīñ-sā.ī mujhe

hoñT tharrāne lage dil kī rageñ khiñchne lagīñ

ai taġhāful kesh terī yaad phir aa.ī mujhe

khīñch le ai jalva-e-jānāñ mirī āñkhoñ kā nuur

phir na jaane kyā dikhā.e sham-e’-bīnā.ī mujhe

jis ka har zarra nazar aata hai saudai mujhe

kash mil jae wahi mahbub-e-harjai mujhe

khinch kar kabe se aksar but-kade mein le gaya

but-tarashi mein kamal-e-naqsh-e-arai mujhe

ho gaya mail-ba-kHuddari mera zauq-e-niyaz

hashr tak rota rahe zauq-e-jabin-sai mujhe

lauh-e-qismat se miTa lene de tahrir-e-firaq

ham-nashin rahne de masruf-e-jabin-sai mujhe

honT tharrane lage dil ki ragen khinchne lagin

ai taghaful kesh teri yaad phir aai mujhe

khinch le ai jalwa-e-jaanan meri aankhon ka nur

phir na jaane kya dikhae sham-e’-binai mujhe