zarre-zarre mein nazar aati hai ranai mujhe

zarre-zarre meñ nazar aatī hai ra.anā.ī mujhe

yaad hai haañ yaad hai vo 'ahd-e-barnā.ī mujhe

ta.ana-zan haiñ phir mirī gulshan-pasandī par harīf

phir kahīñ le chal junūn-e-dasht-e-paimā.ī mujhe

jalva-e-qaus-e-qazah hai yā mai-e-rañgīñ kī mauj

yā nazar aayā fareb-e-husn-e-lailā.ī mujhe

vajd karatā huuñ sadā-e-nāla-e-nā-qūs par

mast kar dete haiñ naġhmāt-e-kalīsā.ī mujhe

baaġh meñ har gaam par taarī huā jaatā hai ġhash

ātish-e-gul hai sharār-e-barq-e-sīnā.ī mujhe

ye hayāt-e-dil-nashīñ ye ik suhānī bazm-e-nāz

ġhaur se dekhā to ik dhokā nazar aa.ī mujhe

jab mire aivān-e-dil par chhā ga.e jalve tire

nañg-e-mahmil laila-e-hasrat nazar aa.ī mujhe

kaash vo 'ehsān' mujh ko apnā saudā.ī kaheñ

yuuñ to ik 'ālam kahā karatā hai saudā.ī mujhe

zarre-zarre mein nazar aati hai ranai mujhe

yaad hai han yaad hai wo 'ahd-e-barnai mujhe

tana-zan hain phir meri gulshan-pasandi par harif

phir kahin le chal junun-e-dasht-e-paimai mujhe

jalwa-e-qaus-e-qazah hai ya mai-e-rangin ki mauj

ya nazar aaya fareb-e-husn-e-lailai mujhe

wajd karata hun sada-e-nala-e-na-qus par

mast kar dete hain naghmat-e-kalisai mujhe

bagh mein har gam par tari hua jata hai ghash

aatish-e-gul hai sharar-e-barq-e-sinai mujhe

ye hayat-e-dil-nashin ye ek suhani bazm-e-naz

ghaur se dekha to ek dhoka nazar aai mujhe

jab mere aiwan-e-dil par chha gae jalwe tere

nang-e-mahmil laila-e-hasrat nazar aai mujhe

kash wo 'ehsan' mujh ko apna saudai kahen

yun to ek 'alam kaha karata hai saudai mujhe