main akela hi nahin bekal tumhaari yaad mein

maiñ akelā hī nahīñ bekal tumhārī yaad meñ

hashr barpā ho rahā hai ’ālam-e-ījād meñ

haañ mirī hastī kabhī thī nāzish-e-husn-e-chaman

ab to muddat se Thikānā hai kaf-e-sayād meñ

har rag-o-pai meñ sarāyat kar rahā hai iztirāb

zindagī kā raaz paatā huuñ tumhārī yaad meñ

ik junūñ-parvar jhalak de kar harīm-e-nāz se

tum ne lākhoñ bijliyāñ bhar diiñ dil-e-nāshād meñ

khul gayā be-iltifātī kā mu'amma khul gayā

lutf kī duniyā hai pinhāñ parda-e-be-dād meñ

shab kī tārīkī meñ ye larzāñ sitāroñ ke hujūm

gulistāñ kī pattī-pattī hai kisī kī yaad meñ

chāñdnī rātoñ ke sannāTe meñ uf un kā ḳhayāl

saikḌoñ mahshar taḌapte haiñ lab-e-fariyād meñ

nuur ke taḌke meñ jab taare jhukāte haiñ nazar

ik jahāñ karvaT badaltā hai dil-e-nāshād meñ

kyā kahūñ 'ehsān' us rañgīñ tasavvur kā surūr

baat ye hāsil nahīñ hotī ḳhudā kī yaad meñ

main akela hi nahin bekal tumhaari yaad mein

hashr barpa ho raha hai ’alam-e-ijad mein

han meri hasti kabhi thi nazish-e-husn-e-chaman

ab to muddat se Thikana hai kaf-e-sayaad mein

har rag-o-pai mein sarayat kar raha hai iztirab

zindagi ka raaz pata hun tumhaari yaad mein

ek junun-parwar jhalak de kar harim-e-naz se

tum ne lakhon bijliyan bhar din dil-e-nashad mein

khul gaya be-iltifati ka mu'amma khul gaya

lutf ki duniya hai pinhan parda-e-be-dad mein

shab ki tariki mein ye larzan sitaron ke hujum

gulistan ki patti-patti hai kisi ki yaad mein

chandni raaton ke sannaTe mein uf un ka KHayal

saikDon mahshar taDapte hain lab-e-fariyaad mein

nur ke taDke mein jab tare jhukate hain nazar

ek jahan karwaT badalta hai dil-e-nashad mein

kya kahun 'ehsan' us rangin tasawwur ka surur

baat ye hasil nahin hoti KHuda ki yaad mein