aks-e-jaanan hum shabih-e-surat-e-jaanana hum

'aks-e-jānāñ ham shabīh-e-sūrat-e-jānāna ham

āshnā haiñ ho nahīñ sakte kabhī begāna ham

tujh ko kyā ma'alūm guzrī kis tarah furqat kī raat

kah phire ik ik sitāre se tirā afsāna ham

hai har ik botal meñ raqsāñ barq-e-muztar kā ḳhamīr

kyuuñ ho muhtāj-e-charāġh-e-majlis-e-mai-ḳhāna ham

hai dam-e-āḳhir sirhāne loriyāñ detī hai maut

sunte-sunte kaash so jaa.eñ tirā afsāna ham

rahm ai snnā-e'-mehr-o-māh aaj aate haiñ vo

haaye kis se māñgne jaa.eñ charāġh-e-ḳhāna ham

paḌ ga.ī kis mehr-sīmā kī nigāh-e-barq-pāsh

dekhte haiñ dil meñ buniyād-e-tajallī-ḳhāna ham

aa gayā hai phir kHayāl-e-mai-kada vaqt-e-sujūd

sāmne paate haiñ mehrāb-e-lab-e-paimāna ham

sar-ba-sajda tere har zarre pe rose-e-hashr tak

ham raheñge ai zamīn-e-kūcha-e-jānāna ham

kar yaqīñ vā'iz ki jū-e-āb-e-zamzam ho ravāñ

pī ke rakh deñ jis jagah rastā huā paimāna ham

dekh ab girte haiñ tharrā.e hue hāthoñ se jaam

chheḌte haiñ mai-gusāroñ meñ tirā afsāna ham

is dil-e-vīrāñ meñ apnī yaad kā 'ālam na pūchh

shab ko kar dete haiñ ThanDā jab charāġh-e-ḳhāna ham

ye irāda hai pahan kar ik gadāyāna-libās

ḳhalq ko taḌpā.eñ kah-kah kar tirā afsāna ham

kis liye behosh ho ai hazrat-e-mūsā uTho

ham uThā.eñge naqāb-e-'āriz-e-jānāna ham

manzil-e-ulfat meñ haiñ 'ehsān' donoñ sadd-e-rāh

khā.eñ kyuuñ āḳhir fareb-e-ka'aba-o-but-kHāna ham

'aks-e-jaanan hum shabih-e-surat-e-jaanana hum

aashna hain ho nahin sakte kabhi begana hum

tujh ko kya ma'alum guzri kis tarah furqat ki raat

kah phire ek ek sitare se tera afsana hum

hai har ek botal mein raqsan barq-e-muztar ka KHamir

kyun ho muhtaj-e-charagh-e-majlis-e-mai-KHana hum

hai dam-e-aKHir sirhane loriyan deti hai maut

sunte-sunte kash so jaen tera afsana hum

rahm ai snna-e'-mehr-o-mah aaj aate hain wo

haye kis se mangne jaen charagh-e-KHana hum

paD gai kis mehr-sima ki nigah-e-barq-pash

dekhte hain dil mein buniyaad-e-tajalli-KHana hum

aa gaya hai phir kHayal-e-mai-kada waqt-e-sujud

samne pate hain mehrab-e-lab-e-paimana hum

sar-ba-sajda tere har zarre pe rose-e-hashr tak

hum rahenge ai zamin-e-kucha-e-jaanana hum

kar yaqin wa'iz ki ju-e-ab-e-zamzam ho rawan

pi ke rakh den jis jagah rasta hua paimana hum

dekh ab girte hain tharrae hue hathon se jam

chheDte hain mai-gusaron mein tera afsana hum

is dil-e-viran mein apni yaad ka 'alam na puchh

shab ko kar dete hain ThanDa jab charagh-e-KHana hum

ye irada hai pahan kar ek gadayana-libas

KHalq ko taDpaen kah-kah kar tera afsana hum

kis liye behosh ho ai hazrat-e-musa uTho

hum uThaenge naqab-e-'ariz-e-jaanana hum

manzil-e-ulfat mein hain 'ehsan' donon sadd-e-rah

khaen kyun aaKHir fareb-e-ka'aba-o-but-kHana hum