عکس جاناں ہم شبیہ صورت جانانہ ہم

عکس جاناں ہم شبیہ صورت جانانہ ہم

آشنا ہیں ہو نہیں سکتے کبھی بیگانہ ہم

تجھ کو کیا معلوم گزری کس طرح فرقت کی رات

کہہ پھرے اک اک ستارے سے ترا افسانہ ہم

ہے ہر اک بوتل میں رقصاں برق مضطر کا خمیر

کیوں ہو محتاج چراغ مجلس مے خانہ ہم

ہے دم آخر سرہانے لوریاں دیتی ہے موت

سنتے سنتے کاش سو جائیں ترا افسانہ ہم

رحم اے صناع مہر و ماہ آج آتے ہیں وہ

ہائے کس سے مانگنے جائیں چراغ خانہ ہم

پڑ گئی کس مہر سیما کی نگاہ برق پاش

دیکھتے ہیں دل میں بنیاد تجلی خانہ ہم

آ گیا ہے پھر خیال مے کدہ وقت سجود

سامنے پاتے ہیں محراب لب پیمانہ ہم

سر بہ سجدہ تیرے ہر ذرے پہ روز حشر تک

ہم رہیں گے اے زمین کوچہ جانانہ ہم

کر یقیں واعط کہ جوئے آب زمزم ہو رواں

پی کے رکھ دیں جس جگہ رستا ہوا پیمانہ ہم

دیکھ اب گرتے ہیں تھرائے ہوئے ہاتھوں سے جام

چھیڑتے ہیں مے گساروں میں ترا افسانہ ہم

اس دل ویراں میں اپنی یاد کا عالم نہ پوچھ

شب کو کر دیتے ہیں ٹھنڈا جب چراغ خانہ ہم

یہ ارادہ ہے پہن کر اک گدایانہ لباس

خلق کو تڑپائیں کہہ کہہ کر ترا افسانہ ہم

کس لیے بے ہوش ہو اے حضرت موسیٰ اٹھو

ہم اٹھائیں گے نقاب عارض جانانہ ہم

منزل الفت میں ہیں احسانؔ دونوں سد راہ

کھائیں کیوں آخر فریب کعبہ و بت خانہ ہم